ევროპული საქართველოს წევრი გიგი წერეთელი ქართულ ოცნებას მათი პარტიის წევრის მიმართ განხორციელებულ ზეწოლაში ადანაშაულებს. წერეთლის თქმით, ევროპული საქართველოს მაჟორიტარობის ერთ-ერთ კანდიდატ რუსუდან კოვზირიძეს, რომელიც ამავდროულად მუნიციპალიტეტის ახალგაზრდული ცენტრის ხელმძღვანელია, ჯერ ოპოზიციურ პარტიასთან თანამშრომლობის გაწყვეტა "ურჩიეს", შემდეგ კი თვითიზოლაციაში მყოფს აუდიტის სამსახურმა ცენტრში მისვლა აიძულა, რასაც სამართალდამცავების მიერ მისი 2 000 ლარით დააჯარიმება მოჰყვა.

"ხელისუფლება წაგების შიშით კვლავ სახიფათო მეთოდებს მიმართავს, რომელმაც წინათ ისეთი ფატალური შედეგები გამოიწვია, როგორიც ია კერზაიას გარდაცვალება იყო. მოსალოდნელი იყო და ამის ძალიან ბევრი ფაქტია, რომ ხელისუფლების საარჩევნო კამპანიის ერთ-ერთი მთავარი მიმართულება არის ზეწოლა, დაშინება, კონკურენტებზე ზემოქმედება", — აღნიშნა წერეთელმა.

ევროპული საქართველოს ბრალდებასთან დაკავშირებით On.ge ქართული ოცნების პრესსამსახურთან დაკავშირებას ცდილობს. მათი პასუხის მიღებისთანავე მასალა განახლდება.

ადგილობრივი თვითმმართველობის არჩევნები 2 ოქტომბერს გაიმართება.