გასულ კვირას პროფესორმა რობერტ კელიმ, რომელსაც აქამდე საზოგადოება ექსპერტად იცნობდა, თავი სულ სხვა ნიშნით დაამახსოვრა. BBC-ის პირდაპირ ეთერში წამყვანი და კელი სამხრეთ კორეის პრეზიდენტის პარკ ჯინ-ჰის იმპიჩმენტის შესახებ საუბრობდნენ, როდესაც ვებკამერით ჩართვის დროს ოთახში მისი მცირეწლოვანი შვილი ცეკვა-ცეკვით შემოვიდა. რამდენიმე წამის შემდეგ მას მეორე ბავშვიც შემოჰყვა. ბოლოს კი ოთახში ქალი შემოვარდა, რომელმაც ბავშვებს ხელი ჩაჰკიდა და სასაცილოდ გაიყვანა ოთახიდან.

ვიდეომ დიდი მითქმა-მოთქმა გამოიწვია ინტერნეტში და ამ ამბავს გაგრძელებაც მოჰყვა. რობერტ კელი ოჯახთან ერთად BBC-ის ეთერში დაბრუნდა და ვრცლად ისაუბრა.

"პროფესორი კელი დაბრუნდა, ამჯერად მისი ოჯახის კადრში გამოჩენა წინასწარ დაგეგმილია“, - წერდა BBC News-ის ოფიციალური გვერდი.

"რამდენჯერმე ვუყურეთ ამ ვიდეოს და ყველა, ვისაც კი ვიცნობთ, ამბობს, რომ სიტუაცია ძალიან სასაცილოა. გვესმის, რატომ უყურებენ ადამიანები ამას სიამოვნებით. ისინი ხედავენ ჩვეულებრივ ოჯახს უჩვეულო სიტუაციაში, რაც ნამდვილად სახალისოა, თუმცა ჩვენ იმაზე უფრო მეტად ვნერვიულობდით, რომ გვეგონა, BBC აღარასდროს დაგვირეკავდა და ურთიერთობა გაგვიფუჭდებოდა", - ამბობს რობერტ კელი.

როგორც პროფესორის მეუღლე ჯუნგ კიმი ამბობს, მასაც გაეცინა ვიდეოს ნახვისას, თუმცა ბევრი ინერვიულა.

"ძალიან ვინერვიულე. მთავარია, ადამიანებმა იმხიარულონ ამ ამბებზე. კამათობდნენ, ძიძა ვიყავი თუ ცოლი. სიმართლე ისაა, რომ მე მისი მეუღლე ვარ და არა ბავშვების ძიძა. ასე რომ, ძალიან გთხოვთ, ამაზე აღარ იკამათოთ“, - ხუმრობით აღნიშნა ჯუნგ კიმმა.

BBC-ის ჟურნალისტის კითხვაზე, მართლა პიჟამო ეცვა თუ არა ინტერვიუს დროს რობერტ კელის, რის გამოც თვითონ არ გაიყვანა ბავშვები ოთახიდან, კელი პასუხობს, რომ მას ინტერვიუს დროს ნამდვილად შარვალი ეცვა.