დეპუტატი სალომე სამადაშვილი პრემიერმინისტრ ირაკლი ღარიბაშვილს ყეყეჩ, უვიც და ტრაგიკომიკურ ფიგურას უწოდებს. მისი თქმით, ღარიბაშვილი "იმ ხელს კბენს, რომელიც აჭმევს". ასე გამოეხმაურა სამადაშვილი ღარიბაშვილის ფრაზას — "ევროპარლამენტარი არ არი ჩემი უფროსი".

ღარიბაშვილმა ეს ფრაზა ვიოლა ფონ კრამონის საპასუხოდ თქვა, რომელმაც საქართველოს მთავრობა ევროკავშირის დახმარებაზე უარის თქმის გამო გააკრიტიკა.

"პანდემიის მართვას რაც შეეხება, თუნდაც, აი, ის, ასე ვთქვათ, ძალიან მოკრძალებული შედეგები რაც გვაქ ვაქცინაციის და ა.შ. ეს არის დიდწილად დახმარების შედეგი და დღეს ყეყეჩი, უვიცი და ტრაგიკომიკური ფიგურა, რომელსაც ჰქვია საქართველოს პრემიერმინისტრი, გამოდის და შეიძლება ითქვას, რო, ასე ვთქვათ, აი, იმ ხელს კბენს, რომელიც აჭმევს, ფაქტიურად, აი, ამ მისი ხელისუფლებისგან გაუბედურებულ, გაღატაკებულ და ჩამოშლილ სახელმწიფოს", — განაცხადა სამადაშვილმა.

სამადაშვილის თქმით, ღარიბაშვილი დასავლეთს იგივე ენით ესაუბრება, როგორითაც რუსეთი. მან პრემიერმინისტრის განცხადებები დასავლეთზე თავდასხმად შეაფასა.

"როდესაც სანქციები დააწესა დასავლეთმა, გახსოვთ, რომ რუსეთმა გადაწყვიტა, რო საპირისპიროდ, საპირწონედ საკუთარი სანქციები შემოეღო. ოღონდ ეს საქართველოს შემთხვევაში სრულიად ტრაგიკომიკურად გამოიყურება იმიტომ, რომ მსურს, ყველას შევახსენო, რომ ჩვენ ვართ ქვეყანა, რომელიც დღეს არსებობს დასავლეთის დახმარების ხარჯზე. დასავლეთის დახმარების გარეშე ჩვენ გვემუქრება სიღატაკე კიდევ უფრო გაზრდილი, ეკონომიკა კიდევ უფრო ჩამოშლილი", — განაცხადა სალომე სამადაშვილმა.

ირაკლი ღარიბაშვილმა ევროკავშირის მაკროფინანსურ დახმარებაზე უარის თქმის შესახებ განცხადება გუშინ, 31 აგვისტოს გააკეთა. საქართველოს მთავრობის გადაწყვეტილებას გამოეხმაურა ევროკავშირიც. საქართველოში ევროკავშირის წარმომადგენლობის ხელმძღვანელის მოვალეობის დროებითი შემსრულებლის, ჟულიენ კრამპის განცხადებით, პატივს სცემენ ხელისუფლების გადაწყვეტილებას, არ მიიღოს ევროკავშირის მაკროფინანსური დახმარება, თუმცა აქვე აღნიშნავენ, რომ საქართველომ მისი მიღების პირობები ვერ შეასრულა. ევროკავშირის განცხადებით, საქართველოსთვის გასაცემი დახმარება დამოკიდებული იქნება ძირითადი რეფორმების განხორციელებისას მიღწეულ წინსვლაზე.