სამოქალაქო ორგანიზაციის, სოციალური სამართლიაობის ცენტრის წარმომადგენლის, გურამ იმნაძის განცხადებით, ქართული ოცნების ხელისუფლების პოლიტიკა უკრაინულ სცენარს ემსგავსება. თუმცა, მისი თქმით, უკრაინისგან განსხვავებით "ოცნება" ცდილობს, ეს პროცესები რბილად გადაატაროს. ასე აფასებს ის, მთავრობის გადაწყვეტილებას არ მიიღოს ევროკავშირის მარკოფინანსური დახმარება.

"რეალურად, ქართული ოცნების ხელისუფლების პოლიტიკა და საბოლოო სტრატეგია ძალიან ემსგავსება უკრაინულ სცენარს, რომელმაც, სამწუხაროდ, უკრაინა მიიყვანა მაიდანამდე. თუმცა, ცხადია, ქართული ოცნება ყველანაირად ცდილობს, რომ ეს ყველაფერი გააკეთოს ბევრად უფრო შეფარვით, რბილად, რათა არ გამოიწვიოს მოსახლეობის, საზოგადოების პროტესტი და ბრაზი, თუმცა საბოლოო ჯამში, ცხადია, ეს ყველაფერი გადის პოლიტიკურ კრიზისზე [...].

ამას აქვს ბევრად უფრო დიდი ფართო გავლენა ზოგადად ქვეყნის ინტეგრაციის პერსპექტივაზე დასავლურ სტრუქტურებთან", — განაცხადა იმნაძემ ფორმულასთან.

ამ თემაზე ისაუბრეს ოპოზიციური პარტიების ლიდერებმაც. ლელოს ლიდერი, მამუკა ხაზარაძე ამბობს, რომ დახმარების მეორე ნაწილის აღებაზე უარის თქმა ქვეყნისა და ხალხის წინაშე უპასუხისმგებლობაა. ენმ-ს დეპუტატი რომან გოცირიძე კი აცხადებს, რომ მთავრობამ წინმსწრებად თქვა უარი ევროკავშირის დახმარებაზე, რათა ის სანქციად არ გამოცხადებულიყო. ევროპული საქართველოს პოლიტსაბჭოს თავმჯდომარის, გიგი წერეთლის განცხადებით კი ის, რომ საქართველო ევროკავშირისგან დახმარებას ვერ მიიღებს გარკვეულწილად სანქციის ფორმაა.

პრემიერმინისტრის, ირაკლი ღარიბაშვილის განცხადებით, გადაწყვეტილი აქვთ, რომ ევროკავშირისგან მაკროსაფინანსო დახმარების მეორე ნაწილის აღებისგან თავი შეიკავონ, რადგან მთავრობამ დაიწყო საგარეო ვალის შემცირება და ამ თანხის მიღების აუცილებლობა, სავარაუდოდ, აღარ იქნება.

ამასთანავე, გუშინ, 30 აგვისტოს, ქართული ოცნების თავმჯდომარემ, ირაკლი კობახიძემ განაცხადა, რომ ევროკავშირისგან მაკროსაფინანსო დახმარებას "ფინანსური დატვირთვა აღარ აქვს".

24 აგვისტოს, პრემიერ ღარიბაშვილთან შეხვედრის შემდეგ, ევროპული საბჭოს პრეზიდენტმა, შარლ მიშელმა განაცხადა, რომ რეფორმები ახლა ისეა საჭირო, როგორც არასდროს. მისივე თქმით, "მოსალოდნელი მაკროსაფინანსო დახმარების გაცემის ვადა ახლოვდება და დროა, საქართველოს მთავრობამ აჩვენოს, რომ ერთგულია შეთანხმების, განსაკუთრებით რეფორმების ნაწილში".