ამბობენ, ცხოვრება თვითონ გამოცდააო და მართლაც, ყოველგვარი სენტიმენტალურობის გარეშე, ეს ასეა. ფორმალური გამოცდა, შესაძლოა, ცხოვრების კონკრეტულ ეტაპზე რაიმე შესაძლებლობას წყვეტდეს, თუმცა, კარიერული წარმატების მისაღწევად გარანტი, თვითრწმენისა და განვითარებაზე ზრუნვის გარდა, არ არსებობს. რეალურად, ყველაფერი საკუთარი თავის პოვნაზეა — მასლოუს პირამიდის თავში რომ თვითრეალიზაციაა წამოსკუპებული, ალბათ გახსოვს. სწორედ საკუთარი პოტენციალის სრულად განხორციელებას უნდა ემსახურებოდეს ის საქმიანობა, რასაც ვაკეთებთ.

თუმცა, გამოცდა ყოველთვის წარმატებით არ სრულდება. თავის მხრივ, არც ყველაფერი სრულდება გამოცდით. მეტიც, ზოგჯერ ალბათ ეს ერთგვარი ბიძგიცაა, რომ არ დანებდე და მეტი ძალისხმევა გაიღო მიზნების მისაღწევად. მარცხის რომანტიზება მართებული არაა, თუმცა, მისი არასწორი აღქმა უფრო უმართებულოა. სწორედ ამაში დაგარწმუნებს იმ უკვე ძალიან წარმატებული ადამიანების ფრაზები, რომლებიც თავის დროზე გამოცდაში ჩაიჭრნენ.

1. რიჩარდ ბრენსონი

ფოტო: Getty Images

მარცხიდან უფრო მეტს ისწავლი, ვიდრე წარმატებიდან. ხოლო თუკი წარმატების მიღწევა გსურს, ფურცელზე დაწერილი მაღალი ნიშნების არქონა ამ გზაზე ნამდვილად ვერ დაგაბრკოლებს.

მიუხედავად გამოსაშვებ გამოცდაზე მიღებული ცუდი შედეგებისა და 16 წლის ასაკში სკოლის დატოვებისა, რიჩარდ ბრენსონი დღეს ბიზნესსამყაროს ერთ-ერთ ყველაზე წარმატებულ ფიგურად ითვლება. ინგლისელი მაგნატის ქონება ამ დროისათვის $6 მილიარდს აღწევს.

"ახალგაზრდებს გამოცდების შედეგებზე დარდში გათენებული უძილო ღამეები კი არა, გამხნევება და გაძლიერება სჭირდებათ".

2. ჯონ სნოუ

ფოტო: Planet Photos

მაღალი ნიშნების შემდეგ ცხოვრება არსებობს.

GOT-ის ცნობილი პერსონაჟის სეხნია დღეს ერთ-ერთი ყველაზე წარმატებული ბრიტანელი ჟურნალისტია. არადა, ყველა გამოსაშვებ გამოცდაში ჩაიჭრა, გარდა ინგლისურისა, სადაც ასევე არცთუ სახარბიელო ქულა მიიღო. თუმცა, იმდენად სურდა, ჟურნალისტი გამხდარიყო, რომ ამ საქმეში წარმატების მისაღწევად გამოცდაზე მიღებულ ქულებს ნამდვილად არ შეუშლია მისთვის ხელი.

"იმედით იშრომე და [წარმატებას] მიაღწევ".

3. ლორდ ალან შუგარი

ფოტო: BBC

შეცდომების დაშვებაზე ნუ იდარდებ, რადგან ადამიანების უმეტესობა სწორედ ასე სწავლობს.

ასევე ცნობილმა ბრიტანელმა ბიზნესმენმა, რომლის ქონებაც მილიარდნახევარ დოლარს აღემატება, გამოსაშვებ გამოცდებზე დიდ წარმატებას ვერ მიაღწია, მოგვიანებით კი არაერთხელ გაუსვა ხაზი იმას, თუ რამდენად მნიშვნელოვანია კარიერული წინსვლისთვის საკუთარი თავის განვითარებაზე ზრუნვა და არა — სხვების ყურება.

"ის ანტრეპრენერი, რომელიც საკუთარ ინსტინქტებს მიჰყვება, წარმატებას უფრო ადვილად აღწევს, ვიდრე ის, ვინც თავისი კონკურენტების პროგრესს მიჰყვება".

4. დოქტორი მარკ ლითგოუ

ფოტო: UCL — London's Global University

წლების განმავლობაში მარცხის გრძნობა ჩემი უახლოესი მეგობარი იყო. საკუთარ შესაძლებლობებში არასდროს დავეჭვებულვარ, თუმცა, ყველაზე რთულ მომენტებში, როცა სწავლის პროცესში მიჭირდა, დილით ადგომის მოტივაციას სწორედ ეს მაძლევდა.

თუმცა, წარმატებული ადამიანები "კონკიას ისტორიით" მხოლოდ ბიზნესსფეროში როდი არიან. დოქტორი მარკ ლითგოუ დღეს ერთ-ერთი ყველაზე ცნობილ და გამოცდილ ნეიროფიზიოლოგად მიიჩნევა. რაც უნდა გასაკვირი იყო, იგი სამ გამოსაშვებ გამოცდაში ჩაიჭრა, ერთში კი ზღვარი ძლივს გადალახა. ეს შედეგები მას საიმედო მომავალს არ უქადდა, თუმცა, დიდი ხნის შემდეგ, 37 წლის ასაკში, ლითგოუმ უკვე წარმატებით შეძლო უმაღლესი აკადემიური ხარისხის მოპოვება.

5. ჯოან როულინგი

ფოტო: Justin Tallis / AFP

შესაძლოა, ისეთივე მარცხი არასდროს განიცადოთ, როგორიც მე, თუმცა, წარუმატებლობა ცხოვრებაში გარდაუვალია. შეუძლებელია, ისე იცხოვროთ, რომ რამეში მაინც არ მოგეცაროთ ხელი; თუკი, რა თქმა უნდა, ისე ფრთხილად არ იქნებით, რომ საერთოდ არ იცხოვრებთ — რაც, თავის მხრივ, უკვე მარცხია.

თანამედროვეობის ერთ-ერთი ყველაზე წარმატებული მწერლის არცთუ წარმატებული წარსულის შესახებ ინფორმაციას ალბათ ბევრჯერ შეხვედრიხართ ინტერნეტსივრცეში. ჰარი პოტერის სამყაროს შემქმნელი 2008 წელს, ჰარვარდის უნივერსიტეტის გამოსაშვებ ცერემონიაზე სიტყვით გამოვიდა და წარუმატებლობის მნიშვნელობაზე გამომწვევი სათაურით — "მარცხის სარგებელი" — ისაუბრა. მართალია, იგი ყველა გამოცდაში არ ჩაჭრილა, თუმცა, პროფესიულის გარდა, პირად ცხოვრებაშიც არაერთხელ განიცადა მარცხი და მხოლოდ ერთმა რამ — წერის სურვილმა და სიყვარულმა — გადაარჩინა. ეს კი კიდევ ერთი მაგალითია, რატომ არის მნიშვნელოვანი იმ საქმის კეთება, რომელიც გიყვარს და იმ საქმის სიყვარული, რომელსაც აკეთებ. როულინგი ხომ საყვარელი საქმის კეთებით მსოფლიოში პირველი მილიარდერი ავტორი გახდა.