გარემოს დაცვისა და სოფლის მეურნეობის მინისტრის, ლევან დავითაშვილის განცხადებით, კახეთში სეტყვით დაზიანებული მევენახეები დახმარებას მიიღებენ. კერძოდ, მევენახეები, რომლებსაც სეტყვამ მოსავალი სრულად გაუნადგურა, ერთჯერადი კომპენსაციის სახით 1 ჰექტარზე 3 000 ლარს მიიღებენ. გარდა ამისა, მუშაობს ქარხნები, რომლებიც დასეტყვილ ყურძენს იბარებენ.

დავითაშვილის თქმით, ამ პუნქტებში დაზიანებული 1კგ რქაწითელი — 0,80 ლარად, 1კგ საფერავი კი 1 ლარად მიიღება. ყურძნის ჩაბარებას მევენახეები 3 სექტემბრის ჩათვლით შეძლებენ.

მთავრობის ადმინისტრაციის რეგიონებთან ურთიერთობის დეპარტამენტის უფროსის, ლერი ბარნაბიშვილის განცხადებით, მოსახლეობა, რომელსაც სხვადასხვა ხეხილის ნერგები გაუნადგურდათ, ჩაერთვებიან პროგრამაში დანერგე მომავალი, რომლის ფარგლებშიც 100%-ით დაუფინანსდებათ ახალი სანერგე მეურნეობა.

26 აგვისტოს, ღამით კახეთში ძლიერმა სეტყვამ სოფლები დააზარალა, განადგურებულია ვენახები და სხვა მოსავალი. ადგილობრივი მოსახლეობა, რომელმაც მოსავალი დაკარგეს მთავრობას დახმარებას თხოვდნენ.

კახეთში სეტყვისგან მიყენებული ზარალის დასათვლელად საკოორდინაციო შტაბი შეიქმნა. დაზიანებულია დაახლოებით 5 000 ჰა-მდე სავარგულები.