პრემიერმინისტრ ირაკლი ღარიბაშვილის განცხადებით, კახეთში სეტყვისგან მიყენებული ზარალის დასათვლელად საკოორდინაციო შტაბი შეიქმნა. მისი ინფორმაციით, ძლიერმა სეტყვამ და ქარმა ყვარლის, თელავისა და გურჯაანის მუნიციპალიტეტებში 4 600 ჰექტარი ვენახი დააზიანა. ღარიბაშვილი აცხადებს, რომ არცერთი დაზარალებული სახელმწიფოს ზრუნვის გარეშე არ დარჩება.

"სახელმწიფო ყველაფერს აკეთებს დაზარალებული მოსახლეობის დასახმარებლად. ამ პროცესის წარმართვა ვიცე-პრემიერ ლევან დავითაშვილს დავავალე. შექმნილია საკოორდინაციო შტაბი, სადაც მიმდინარეობს ზარალის დათვლა. ადგილზე იმყოფება ჩემი წარმომადგენელი, მთავრობის ადმინისტრაციის რეგიონებთან ურთიერთობის დეპარტამენტის ხელმძღვანელი ლერი ბარნაბიშვილი. არცერთი დაზარალებული არ დარჩება სახელმწიფოს ზრუნვის გარეშე", — წერს ღარიბაშვილი.

ამასთანავე, ღვინის ეროვნული სააგენტოს განცხადებით, გარემოს დაცვისა და სოფლის მეურნეობის მინისტრის, ლევან დავითაშვილის დავალებით, სახელმწიფო საწარმო შპს მოსავლის მართვის კომპანია დღეიდან მზად არის, სეტყვით დაზიანებული ყურძენი მიიღოს და გადაამუშაოს.

"როგორც რთველის საკოორდინაციო შტაბში დღეს გამართულ თათბირზე აღინიშნა, ყველა რესურსი იქნება მობილიზებული, იმისთვის, რომ დაზარალებულმა მევენახეებმა შეუფერხებლად შეძლონ მოსავლის დაბინავება.

დასეტყვილი ყურძნის დაბინავება თელავში, გურჯაანსა და ყვარლის მუნიციპალიტეტებში უკვე შესაძლებელია", — ნათქვამია განცხადებაში

26 აგვისტოს, ღამით კახეთში ძლიერმა სეტყვამ სოფლები დააზარალა, განადგურებულია ვენახები და სხვა მოსავალი. ადგილობრივების თქმით, ზარალი ძალიან დიდია და მათ ხელისუფლებისგან დახმარებას ითხოვეს.