ვებსაიტმა OnlyFans თავისი წარსული გადაწყვეტილება შეცვალა და განაცხადა, რომ პლატფორმაზე სექსუალური შინაარსის მასალას ისევ დაუშვებს. რამდენიმე დღით ადრე ლონდონში მდებარე კომპანიამ მომხმარებლებსა და კონტენტის შემქმნელებს აცნობა, რომ ოქტომბრიდან სექსუალური ხასიათის ფოტოებსა და ვიდეოებს აკრძალავდა. მიზეზი ის იყო, რომ OnlyFans ამგვარი კონტენტის გამო პარტნიორების და გარე დამფინანსებლების პოვნა უჭირდა.

"ჩვენ მივიღეთ გარანტიები, რომლებიც აუცილებელი იყო მრავალფეროვანი კონტენტის შემქმნელთა მხარდასაჭერად და შევაჩერეთ დაგეგმილი ცვლილებები. OnlyFans მხარს უჭერს ინკლუზიურობას და კვლავ იქნება ყველანაირი მასალის შემქმნელის ოჯახი", — განაცხადა კომპანიამ.

ცვლილებები კომპანიამ მას შემდეგ შეაჩერა, რაც უამრავმა ადამიანმა განაცხადა, რომ საიტი მათთვის პანდემიის დროს ერთადერთი მთავარი შემოსავალი იყო. მაგალითად, ვაშინგტონელმა მარტოხელა დედამ, მორგან მიუზიქმა თქვა, რომ სექსუალური შინაარსის ფოტოებითა და ვიდეობით მიღებული შემოსავალი მას გადასახადების გადახდაში ეხმარებოდა და ამ გზით შფოთვასა და შიშებს უმკლავდებოდა:

"ამ საიტის საშუალებით ცხოვრებაში პირველად შევძელი თანხის დაზოგვა, გავაუმჯობესე საკრედიტო ისტორია და პირველად ვიგრძენი, რას ნიშნავს, როცა ცხოვრებისგან რაღაცის მიღება შეგიძლია".

2016 წელს დაფუძნებულ OnlyFans ამჟამად 130 მილიონამდე მომხმარებელსა და კონტენტის 2 მილიონზე მეტ შემქმნელს აერთიანებს. კომპანიის განცხადებით, ჯამში შემქმნელებმა მათი პლატფორმის საშუალებით $5 მილიარდი გამოიმუშავეს. თუმცა, აღსანიშნავია, რომ მასზე განთავსებულ კონტენტს უმეტესად სექსუალური ხასიათის გამო იცნობენ.