პრემიერმინისტრი ღარიბაშვილი სექსისტურ განცხადებას აკეთებს. მისი აზრით, პოლიტიკოსისთვის, მით უმეტეს კაცისთვის, მეუღლის საარჩევნო კამპანიაში ჩართვა მიზანშეწონილი არ არის.

"მე არ მიმაჩნია მიზანშეწონილად, მითუმეტეს კაცისთვის და პასუხისმგებლიანი პოლიტიკოსისთვის, რომ საკუთარი მეუღლე ჩართოს საარჩევნო კამპანიაში", — თქვა ღარიბაშვილმა.

ჟურნალისტის კითხვაზე, რამდენად სწორია, პრემიერის მხრიდან ოჯახის წევრის საარჩევნო კამპანიაში ჩართვას დეგრადაცია ეწოდოს, მაშინ როდესაც ღარიბაშვილის ოჯახის წევრებიც თავის დროზე წინასაარჩევნო კამპანიაში იყვნენ ჩართულები, ღარიბაშვილი პასუხობს, რომ მას აქვს უფლება საკუთარი პირადი აზრი გამოხატოს.

"გასაგებია, მაგრამ ოჯახთან ერთად, მე ასე ვთვლი და ეს არის ჩემი პირადი მოსაზრება, რა თქმა უნდა, მიზანშეუწონლად მიმაჩნია, რომ საკუთარი მამა გამოაგზავნო და საარჩევნო კამპანიაში ჩართო, ეს არ მიმაჩნია მე სწორად, ეს ჩემი პირადი აზრია, მაქვს ამის უფლება, რომ ჩემი აზრი გამოვხატო", — განაცხადა ღარიბაშვილმა.

აღსანიშნავია, რომ მსგავსი განცხადება მან გააკეთა გუშინაც, 25 აგვისტოს. ღარიბაშვილმა პოლიტიკურ პარტიებს, რომლებსაც წინასაარჩევნო კამპანიაში ოჯახის წევრები ჰყავთ ჩართული "დეგრადირებული" უწოდა. მისი მტკიცებით, ექსპრეზიდენტმა მიხეილ სააკაშვილმა "საკუთარი მეუღლე გაწირა" პოლიტიკური ბატალიებისთვის, ხოლო ენმ–ის ამჟამინდელმა თავმჯდომარემ, ნიკა მელიამ "თავისი მოხუცი მამა, ასაკში მყოფი მამა" გამუშვა არჩევნებისთვის ქალაქ ზუგდიდში. მისი ეს განცხადება ეიჯიზმად შეიძლება ჩაითვალოს.

"ვერც მამები უშველიან, ვერც ცოლები და ვერც სხვა, ასე ვთქვათ, ფარები მათ. ეს არის ის უმსგავსობა და უღირსობა, რომელიც მართლაც უნდა დავამთავროთ ამ ქვეყანაში. არ შეიძლება, ადამიანებმა გამოიყენონ საკუთარი პოლიტიკური მიზნებისთვის ყველა და ყველაფერი", — თქვა მან.