მზრუნველ პატრონსა და მყუდრო სახლს ყველა ცუგა იმსახურებს და გამონაკლისი არც კახელი მელაკუდაა, რომელიც მალე უკრაინაში გაემგზავრება.

მელაკუდას ისტორია საზოგადოებას ნათია ბეუქლიშვილმა საკუთარ ფეისბუქ გვერდზე გაუზიარა. როგორც ჩანს, ცუგას თელავში მოკვლით ემუქრებოდნენ, ამიტომაც მელაკუდა ცხოველების მოყვარულმა ადამიანებმა ნათიასთან ყვარელში ჩამოიყვანეს. ნათიამ მელაკუდას კასტრაცია და სხვა საჭირო პროცედურები ჩაუტარა და მიიკედლა.

ცუგა სასტუმრო "შატო ყვარელში" დასახლდა, სადაც უკრაინელი ტურისტი და მომავალი პატრონი გაიცნო. ტურისტმა მელაკუდასთვის ახალი სახლის ჩუქება და მისი უკრაინაში წაყვანა გადაწყვიტა.

მელაკუდა ნათიამ და სასტუმროს თანამშრომლებმა უკვე თბილისში გააცილეს. მელაკუდას ვეტერინარები სხვადასხვა გამოკვლევას ჩაუტარებენ, შემდეგ კი პასპორტს გაუკეთებენ. უსაყვარლესი კახელი ცუგა თბილისიდან სულ მალე უკრაინაში, ახალ მყუდრო სახლში აღმოჩნდება.