Sex and the City-ის ეკრანებზე დაბრუნებას საკულტო სერიალის გულშემატკივრები დიდი ენთუზიაზმით ელიან. ფანების ნაწილს სერიალის განუყრელი მეგობრებიდან ერთ-ერთის — სამანტას როლის შემსრულებლის, კიმ კეტრელის წასვლამ გული ნამდვილად დასწყვიტა. რამდენიმე დღის წინ ცნობილი გახდა, რომ სერიალი კვლავ ოთხი დაქალის ისტორიას მოგვიყვება — სარა ჯესიკა პარკერის, სინტია ნიქსონისა და კრისტინ დევისის პერსონაჟებს ნიკოლ არი პარკერის გმირი შეემატება.

ნიკოლ არი პარკერი ისეთი სერიალებითაა ცნობილი, როგორებიცაა Empire და Boogie Nights. Sex and the City-ის ახალ სეზონში, სახელად Just Like That… ნიკოლი ქერის ახალი საუკეთესო მეგობრის — ლიზა ტოდის როლს შეასრულებს.

ახალი ოთხეულის ფოტოები სერიალის გულშემატკივრებს სარა ჯესიკა პარკერმა ინსტაგრამზე გაუზიარა.

And Just Like That… ახალი ოთხეულის ცხოვრების შესახებ ამჯერად 50 წელს გადაცილებული ქალების პერსპექტივით მოგვიყვებიან. შოუში გამოჩნდებიან სხვა ისეთი ცნობილი პერსონაჟები, როგორებიც არიან მისტერ ბიგი, ენტონი მარენტინო და სტენფორდ ბლაჩი. ასევე ვიხილავთ ახალ სახეებსაც: სარა რამირესი არაბინარული გენდერული იდენტობის მქონე პერსონაჟის როლს მოირგებს.

Sex and the City-ის სერიალი 2004 წელს დასრულდა, მასზე გადაღებული მეორე ფილმი კი 2010 წელს გამოვიდა. ამ სამყაროს გმირების ახალი ისტორია, რომელსაც HBO Max იღებს, თანამედროვე დროში განვითარდება და მასში არც კორონავირუსის პანდემიას აუვლიან გვერდს. ახალი სეზონის გამოსვლის თარიღი ჯერჯერობით ცნობილი არაა.

ამავე თემაზე: