ერთგულმა მაყურებლებმა უკვე კარგად იციან, რომ საკულტო სერიალის Sex and the City (სექსი დიდ ქალაქში) ახალ სეზონს იღებენ და უკვე ცნობილი გახდა ისიც, რომ მთავარ გმირებთან ერთად კიდევ ერთ ნაცნობ სახეს ვიხილავთ შოუს გაგრძელებაში: მისტერ ბიგს!

მსახიობი კრის ნოთი, რომელიც კერი ბრედშოუს პარტნიორს განასახიერებდა, ახალ სიქველ სერიალში, სახელწოდებით And Just Like That… (და სწორედ აი, ასე...), კვლავ მოირგებს მისტერ ბიგის როლს.

"აღფრთოვანებული ვარ, რომ კვლავ მექნება კრისთან თანამშრომლობის შესაძლებლობა. როგორ შევძლებდით სექსის დიდ ქალაქშის ახალი თავის შექმნას მისტერ ბიგის გარეშე?", — განაცხადა სერიალის პროდიუსერმა მაიკლ პატრიკ კინგმა.

კრის ნოთი

ფოტო: Joel C. Ryan / Associated Press

ახალ სეზონზე სტრიმინგ სერვისი HBO Max მუშაობს და კომპანიის ცნობით, სერიალი ისევ კერის (სარა ჯესიკა პარკერი), მირანდას (სინტია ნიქსონი) და შარლოტის (კრისტინ დევისის) მეგობრობის შესახებ მოგვითხრობს, ოღონდ ამჯერად არა 30-ის, არამედ 50 წელს გადაცილებული ქალების ყოველდღიური პრობლემებითა და თავგადასავლებით.

ცნობილია ისიც, რომ And Just Like That…-ში მონაწილეობას არ მიიღებს კიმ კეტრელი და დიდი ალბათობით, მის პერსონაჟს — სამანტასაც ვერ ვიხილავთ. სანაცვლოდ შოუს დაემატა ისეთი ახალი სახე, როგორიცაა სარა რამირესი.

მომავალი შოუს გადაღება ამ ზაფხულსაა დაგეგმილი და მისი სიუჟეტი თანამედროვე დროს, პანდემიასთან მებრძოლ სამყაროში განვითარდება.