უკრაინის პრემიერმინისტრი აცხადებს, რომ უკრაინა დაინტერესებულია საქართველოსთან სარკინიგზო ტრანზიტის განვითარებით და მან ეს საკითხი საქართველოს პრემიერმინისტრთან შეხვედრაზე დააყენა. ამის შესახებ განცხადება დენის შმიგალმა შეხვედრის შემდეგ გამართულ პრესკონფერენციაზე გააკეთა.

"გამოვთქვი დაინტერესება საქართველო-უკრაინის რკინიგზის ტრანზიტული პოტენციალის ინტენსიური განვითარებით. უნდა გამოვიყენოთ შავი ზღვის პორტების და ჩვენს ქვეყნებს შორის საბორნე მიმოსვლებისთვის განკუთვნილი ინფრასტრუქტურა და ასევე გამოვიყენოთ ყველა ძალისხმევა იმისთვის, რომ გავზარდოთ ტვირთების ნაკადი, როგორც ჩვენს ქვეყნებს შორის, ასევე უზრუნველვყოთ გადაზიდვები მესამე ქვეყნებში საქართველოს და უკრაინის ტერიტორიების გამოყენებით", — აცხადებს უკრაინის პრემიერმინისტრი.

მისი თქმით, ამ კონტექსტში ღარიბაშვილთან შეთანხმდნენ, რომ გაგრძელდება კონსულტაციები ევროკომისიასთან საქართველოს, უკრაინის და ევროკავშირის სხვა ქვეყნების საზღვაო პორტებში სატვირთი მიმოსვლისთვის ხელსაყრელი პირობების უზრუნველყოფისთვს.

ამასთან, მან აქცენტი გააკეთა საქართველოსა და უკრაინას შორის ვაჭრობის განვითარებაზე. მან აღნიშნა, რომ ჩვენი ორმხრივი ვაჭრობის დინამიკა ახალ ნიშნულზე გავიდა და 2021 წლის პირველ ხუთ თვეში 32%-ით გაიზარდა.

"იმედი მაქვს, რომ მის განვითარებას მოვახდენთ ეკონომიკური თანამშრომლობის საკითხებში ერთობლივი ქართულ-უკრაინული მთავრობათაშორისი კომისიის ფარგლებში საექსპერტო მოლაპარაკებების შემდეგ, რომლის მესამე სხდომა არის დაგეგმილი თბილისში სექტემბრის ბოლოს", — ამბობს ის.

მისივე თქმით, საქართველოს და უკრაინას აქვს ყველა წინაპირობა საინვესტიციო თანამშრომლობის გაფართოებისთვის. როგორც მან აღნიშნა, განიხილეს ბიზნესის მონაწილეობის შესაძლებლობა პრივატიზაციის პროცესში ერთობლივი მაღალტექნოლოგიური საწარმოების განვითარებაში და ასევე, ინფრასტრუქტურულ პროექტებში.

"დღევანდელ შეხვედრის შედეგებს ძალიან მნიშვნელოვნად ვაფასებ და დარწმუნებული ვარ, როგორც ჩვენს ქვეყნებს შორის მაღალი დონის პოლიტიკური და ეკონომიკური დიალოგის ინტენსიფიკაციაში, ასევე საქართველოსა და უკრაინას შორის ურთიერთქმედების კონკრეტულ სფეროებში ყოვლისმომცველი თანამშრომლობის წარმატებაში", — აცხადებს უკრაინის პრემიერი.

საქართველოს პრემიერმინისტრი ირაკლი ღარიბაშვილი უკრაინაში ოფიციალური ვიზიტით იმყოფება და შეხვედრებს მართავს. უკრაინაში, პრემიერთან ერთად, საგარეო საქმეთა და თავაცვის მინისტრებიც იმყოფებიან. ღარიბაშვილი უკვე შეხვდა თავის უკრაინელ კოლეგას — პრემიერმინისტრ დენის შმიგალს. ხვალ, 23 აგვისტოს იგი მონაწილეობას მიიღებს ყირიმის პლატფორმის სამიტში, რომელსაც 40-ზე მეტი სახელმწიფოს ლიდერები დაესწრებიან.