Windows 10-ის გამოყენებისას, პარამეტრებში რეგიონად საქართველოს არჩევის შემთხვევაში, მომხმარებელს რუსული საძიებო სისტემა, Yandex უყენდება. როგორც Microsoft-ის საქართველოს წარმომადგენლობაში ამბობენ, ეს ე.წ. Preview Build-ში (წინასწარ ვერსიაში) ხდება, რომელიც, გამოსასწორებელია:

"როცა პოსტსაბჭოთა სივრცის ქვეყნებს უთითებენ ვინდოუსის ინსტალაციისას, იანდექსი ავტომატურად ირჩევა ძირითად საძიებო სისტემად. ეს იმიტომ, რომ Bing-ის საძიებო სისტემა, სამწუხაროდ, ჩვენს რეგიონში არ არის განვითარებული და არ მუშაობს ისე, როგორც Google. აქ ასეთი პოლიტიკაა - როცა გუგლი არაა საქართველოში, მისი შეთავაზება არ ხდება, ამიტომ, ავტომატურად ეთითება ის სიტემა, რომელიც უფრო კარგად მუშაობს ჩვენს რეგიონში. ამაზე მოთხოვნა უკვე შეტანილია, მოაგროვა ხმებიც, სავარაუდოდ, ახლო მომავალში ეს გასწორდება".

"ნაგულისხმევი საძიებო სისტემიდან" იანდექსის ამოსაღებად, მაიკროსოფტთან უკუკავშირის ფორმის გამოყენებაა აუცილებელი. შესაბამისი ფორმა უკვე შეავსო მაიკროსოფტის შესახებ ტექნოლოგიური პორტალის, MSinfo.ge-ს დამფუძნებელმა და მთავარმა რედაქტორმა, ანზორ ამზოევმა.

„უკუკავშირის ფორმატში ამ მოთხოვნაზე რაც შეიძლება მეტი ხმის (upvote) დაგროვებაა საჭირო. ამის შემდეგ, ვინდოუსის გუნდი საკითხს სათანადო ყურადღებას მიაქცევს,“ - უთხრა ამზოევმა On.ge-ს.

მათ, ვინც Windows-ის წინასწარი ვერსიების ტესტირების პროგრამაშია გაწევრიანებული, საკითხზე საკუთარი მოსაზრების დაფიქსირება ამ ბმულზე შეუძლიათ.