OnlyFans, აპლიკაცია, რომელიც მომხმარებელს მხოლოდ ზრდასრულებისთვის განკუთვნილ კონტენტს სთავაზობს, საკუთარ პლატფორმაზე მალე სექსუალური ხასიათის ფოტოებსა და ვიდეოებს აკრძალავს.

კომპანიამ განაცხადა, რომ აიკრძალება მხოლოდ სექსუალური ხასიათის კონტენტი, თუმცა, სიშიშვლე, რომელიც ამგვარად არ კვალიფიცირდება, ისევ დასაშვები იქნება.

"იმისთვის, რომ პლატფორმის ხანგრძლივად ფუნქციონირება და კონტენტის შემქმნელებისა და მომხმარებლების ინკლუზიური საზოგადოების მასპინძლობა შევძლოთ, ჩვენი წესები უნდა დაიხვეწოს", — აღნიშნავს კომპანია, — "კონტენტის შემქმნელებს კვლავ შეეძლებათ ისეთი მასალის გამოქვეყნება, რომელიც სიშიშვლეს შეიცავს, მაგრამ ჩვენს წესებს არ ეწინააღმდეგება".

თუმცა, დაანონსებულ აკრძალვას კონტენტის შემქმნელების მხრიდან უკვე მოჰყვა უარყოფითი გამოხმაურება. ერთ-ერთი მათგანი, რომელიც კომიკოსი და პოდკასტის წამყვანია, ამბობს, რომ ქირის გადახდა პლატფორმაზე გამოქვეყნებული სწორედ სექსუალური ხასიათის კონტენტით მიღებული შემოსავლით შეძლო.

წესების შეცვლით გამოწვეულ ზარალზე საუბრობენ სხვებიც.

"სამწუხაროდ, თუკი ჩემს ფანებს სხვა პლატფორმაზე არ გადავიყვან, ჩემი კონტენტით შექმნილი შემოსავლის დიდ ნაწილს დავკარგავ", — ამბობს ერთ-ერთი შემქმნელი, რომელიც ამჟამად $100-დან $1200-მდე გამოიმუშავებს.

როგორც ერთ-ერთი გამოცემა იტყობინება, OnlyFans ამგვარი კონტენტის გამო პარტნიორების და გარე დამფინანსებლების პოვნა უჭირს. კომპანიის განცხადებით, ცვლილებები თანხვედრაშია მათი საბანკო პარტნიორებისა და გადახდის სერვისის მიმწოდებლების მოთხოვნებთან.

2016 წელს დაფუძნებულ OnlyFans ამჟამად 130 მილიონამდე მომხმარებელსა და კონტენტის 2 მილიონზე მეტ შემქმნელს აერთიანებს. კომპანიის განცხადებით, ჯამში შემქმნელებმა მათი პლატფორმის საშუალებით $5 მილიარდი გამოიმუშავეს. თუმცა, აღსანიშნავია, რომ მასზე განთავსებულ კონტენტს უმეტესად სექსუალური ხასიათის გამო იცნობენ.