დაავადებათა კონტროლის ეროვნული ცენტრის დირექტორმა, ამირან გამყრელიძემ ისაუბრა, თუ რატომ დაგვიანდა საქართველოში ორსულთა ვაქცინაცია და დაასახელა კონკრეტული მიზეზებიც. ამირან გამყრელიძის განმარტებით, მსოფლიო მასშტაბით ორსულთა ვაქცინაცია დღესდღეობით დაშვებულია სამი ვაქცინით — Pfizer, Moderna და AstraZeneca.

საქართველოში ამ ეტაპზე აცრა ოთხი — Pfizer, AstraZeneca, Sinopharm და Sinovac ვაქცინებით მიმდინარეობს. გამყრელიძის თქმით, ორსულებს ჩინური ვაქცინით ვერ აცრიდნენ, რადგან მიუხედავად იმისა, რომ ინაქტივირებული ვაქცინებია, მასზე კვლევები არ არის ჩატარებული. ამასთან როგორც გამყრელიძე ამბობს, AstraZeneca-ს შემთხვევაში არსებობს ასაკობრივი ზღვარი, 45 წელი.

"Pfizer-ის მნიშვნელოვანი დოზები ქვეყანაში შემოვიდა ივნისი-ივლისის პერიოდში, ამიტომაც, სამწუხაროდ, ჩვენ ვერ დავიწყეთ ორსულთა აცრები", — განმარტა გამყრელიძემ.

ამირან გამყრელიძის შეფასებით, ორსულთა ვაქცინაციის დაგვიანების კიდევ ერთი მიზეზია ზედმეტი სიფრთხილე, როგორც თავად ორსულების, ასევე მედპერსონალის მხრიდანაც.

"სამწუხაროდ ბევრი ჩემი კოლეგა არ ურჩევდა და არ ურჩევს ორსულებს აცრას, არადა აუცილებელია, რომ ორსულები აიცრან. არის Pfizer-ის შესაბამისი მარაგი ქვეყანაში, რომ ისინი აიცრან და აუცილებელია, რომ ისინი აიცრან. აცრა სწორედ იცავს ორსულს, ორსული მოგეხსენებათ, მომატებული რისკია ყოველგვარი ინფექციური დაავადებისა, მათ შორის კოვიდისაც", — თქვა ამირან გამყრელიძემ.

ამირან გამყრელიძემ კიდევ ერთხელ მოუწოდა ორსულებს აცრისკენ და თქვა ისიც რომ ორსულთა გარდაცვალების საკმაოდ ცუდი მაჩვენებელი გვაქვს. კერძოდ, მისი თქმით, შარშან ორსულის კორონავირუსით გარდაცვალების მხოლოდ ერთი შემთხვევა გვქონდა, ხოლო წელს — 8.

"დედათა სიკვდილიანობა, ორსულთა სიკვდილიანობა, მოგეხსენებათ, არის ერთ-ერთი მნიშვნელოვანი ინდიკატორი ქვეყნისა და ჯანდაცვის სისტემის განვითარების. კოვიდის პერიოდში, სამწუხაროდ, მოიმატა ორსულთა გარდაცვალების შემთხვევებმა. და ჩვენც გვაქვს საქართველოში, განსაკუთრებით წელს. შარშან გვქონდა ერთი, წელს უკვე დადასტურებული 8 შემთხვევა და მე-9 გახლავთ შესწავლის სტადიაში", — თქვა გამყრელიძემ.

გაიგე მეტი: