რამდენიმე დღის წინ პოპვარსკვლავმა ლიზომ კარდი ბისთან ერთად ახალი მუსიკალური კლიპი, სახელად Rumors გამოუშვა. კლიპის გამოსვლის შემდეგ ლიზოს ანგარიშზე სიძულვილის ენის შემცველი კომენტარები გაჩნდა, რასაც მომღერალი ინსტაგრამ ლაივზე ცრემლმორეული გამოეხმაურა. მომღერლის ლაივის შემდეგ Facebook-მა და Instagram-მა სიძულვილის ენის შემცველი კომენტარების წაშლა დაიწყო.

"ხანდახან ვგრძნობ, რომ სამყაროს უბრალოდ არ ვუყვარვარ. თითქოს აზრი არ აქვს, რა რაოდენობით პოზიტიურ ენერგიას გასცემ სამყაროში, მაინც გამოჩნდებიან ადამიანები, რომელთაც შენ შესახებ ცუდი რაღაცების თქმა უნდათ", — განაცხადა ლიზომ ლაივის დროს.

ლიზოს თქმით, კომენტარები რასისტული ხასიათისაა და მომღერლის წონასაც უკავშირდება, რამაც მას გული ატკინა. მომღერალმა, რომელსაც გრემი აქვს მიღებული, აღნიშნა, რომ ძალიან ბევრს მუშაობდა, ამიტომ მსგავსმა კომენტარებმა განსაკუთრებულად დაასევდიანა.

ლიზოს მხარდაჭერა კარდი ბიმ ტვიტერზე საჯაროდ გამოუცხადა:

"როდესაც საკუთარ თავს იცავ, პრობლემურსა და მგრძნობიარეს გეძახიან. როცა ამას არ აკეთებ, ისინი განადგურებენ მანამ, სანამ ასე არ ატირდები. სულერთია, როგორი ხარ —გამხდარი, მსუქანი თუ ხელოვნური — ისინი ყოველთვის ცდილობენ, რომ საკუთარი თავდაუჯერებლობა შენზე გადმოიტანონ", — წერს კარდი ბი.

Facebook-ის წარმომადგენლის განცხადებით, Facebook-სა და Instagram-ზე ლიზოს ანგარიშზე დაწერილი კომენტარების წაშლის მიზეზი ისაა, რომ სიძულვილის ენის შემცველი კომენტარები, ბულინგი და შეურაცხყოფა კომპანიისა და აღნიშნული სოციალური ქსელების გამოყენების წესებს ეწინააღმდეგება.