13 აგვისტოს სასამართლოში წარდგენილი ახალი სარჩელის თანახმად, ბობ დილანმა 1965 წელს არასრულწლოვანი, 12 წლის გოგო ნარკოტიკებითა და ალკოჰოლით გააბრუა და შემდეგ მასზე სექსუალურად იძალადა.

მოსარჩელე, რომლის იდენტობა ჯერ საჯაროდ ცნობილი არ არის და მედიაში, სავარაუდოდ, მისი სახელი-გვარის მხოლოდ ინიციალები გავრცელდა — JC, აღძრულ სარჩელში აღნიშნავს, რომ თანამედროვეობის ერთ-ერთი ყველაზე გავლენიანი ამერიკელი მუსიკოსი, ბობ დილანი 1965 წლის აპრილი-მაისის პერიოდში ექვსი კვირის განმავლობაში ცდილობდა, რომ მისი ნდობა მოეპოვებინა და დაახლოებოდა.

JC, ახლა უკვე 68 წლის ქალი, რომელიც კონექტიკუტის შტატში, ქალაქ გრინვიჩში ცხოვრობს, ამტკიცებს, რომ დილანმა, როცა 23-24 წლის იყო, "გამოიყენა მუსიკოსის სტატუსი, რათა ზრუნვით დაახლოებოდა და კონტროლი მოეპოვებინა მასზე შემდგომში სექსუალური ძალადობისთვის".

სარჩელის თანახმად, ბობ დილანმა დაამყარა კავშირი JC-თან, რათა "მასზე სექსუალურად ეძალადა, რაც გააკეთა კიდეც ნარკოტიკების, ალკოჰოლის, მუქარისა და ფიზიკური ძალადობის გამოყენებით, რის გამოც ის [JC] დღემდე ემოციურად დათრგუნული და ფსიქოლოგიურად დაზიანებულია".

სასამართლოში შეტანილ სარჩელში აღნიშნულია, რომ მუსიკოსმა, რომელსაც ასევე ნობელის პრემია გადაეცა ლიტერატურის დარგში, ათწლეულების წინ მოსარჩელეზე არაერთხელ იძალადა, მათ შორის რამდენიმე შემთხვევა მანჰეტენზე ცნობილ სასტუმრო Chelsea-ში მოხდა. ბრალდების მიხედვით, ამ ძალადობამ მომჩივანს დეპრესია, შფოთვა და დამცირება მოუტანა შედეგად, რასაც "მუდმივი ხასიათი აქვს და ამან უნარი წაართვა, რომ ყოველდღიური ცხოვრება ჩვეულებრივად გაეგრძელებინა".

ამჟამად 80 წლის ბობ დილანის წარმომადგენელმა აღნიშნულ სარჩელთან დაკავშირებით განაცხადა, რომ "56 წლის წინანდელი ბრალდება სიმართლეს არ შეესაბამება და [სიმართლეს] შესაბამისად დაიცავენ".