16 აგვისტოს შრი-ლანკის პრეზიდენტმა თანამდებობიდან გაათავისუფლა ჯანდაცვის მინისტრი, რომელიც საჯაროდ გასცემდა რეკომენდაციას, რომ Covid-19-ის ვირუსთან საბრძოლველად სხვადასხვა ტიპის "ჯადოქრობისთვის" და "მაგიური ნაყენებისთვის" მიემართათ.

ფრანგული საერთაშორისო სააგენტო France 24-ის ცნობით, შრი-ლანკის უკვე ყოფილი ჯანდაცვის მინისტრი, პავიტრა ვანიარაჩი, მიუხედავად იმისა, რომ იანვარში თავადაც დაინფიცირდა კორონავირუსით, ჯადოქრის მიერ დამზადებული "სასწაულმოქმედი წამლის" მიღებისკენ მოუწოდებდა მოსახლეობას.

მან ასევე "ნაკურთხი" წყალი ჩაასხა მდინარეში მას შედეგ, რაც თვითგამოცხადებულმა "ღმერთკაცმა" უთხრა, რომ ამ გზით პანდემიას დაასრულებდა კუნძულოვან სახელმწიფოში, რომელშიც 21 მილიონზე მეტი ადამიანი ცხოვრობს.

პავიტრა ვანიარაჩი განსაკუთრებული კრიტიკის ქარცეცხლში გასული კვირიდან გაეხვა, რადგან ქვეყანაში ეპიდემიური სიტუაცია გაუარესდა, ის კი კვლავ არასათანადოდ აფასებდა არსებულ მძიმე კრიზსს.

მიუხედავად გადაყენებისა, მას მთავრობის კაბინეტი არ დაუტოვებია: პრეზიდენტმა მას ნაკლებად მნიშვნელოვანი თანამდებობა — ტრანსპორტის მინისტრობა გადააბარა.

Aljazeera-ს ინფორმაციით, შრი-ლანკაში გასულ კვირას დღიურად ვირუსით გარდაცვლილთა რაოდენობამ 150-ს გადააჭარბა.

სამხრეთ აზიაში მდებარე ამ ქვეყანაში ყოველ დღე დაინფიცირების 3 000-ზე მეტი ახალი შემთხვევა აღირიცხება, რის გამოც საავადმყოფოები გადატვირთულია და სამედიცინო პერსონალი — არასაკმარისი. ჯანდაცვის სფეროს სახელმწიფო წარმომადგენლებიც კი აღიარებენ, რომ დიდი ალბათობით, დაინფიცირებულთა რეალური მაჩვენებელი სამჯერ უფრო მეტი შეიძლება იყოს.