დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, ლუგარში დადასტურებული თითქმის ყველა დადებითი შემთხვევების 90% დელტა შტამია.

"დელტა შტამი მეტი აგრესიულობით, გავრცობადობით ხასითდება, განსაკუთრებით ახალგაზრდა ასაკში, ამიტომაც გვაქვს ინფექციის სერიოზული გავრცელება სხვა მიზეზებთან ერთად", — განაცხადა გამყრელიძემ.

ქვეყანაში ეპიდემიოლოგიური მდგომარეობა სულ უფრო და უფრო მძიმდება. ინფიცირების ყოველდღიური მაჩვენებელი ბოლო პერიოდში 5 ათასს აჭარბებს.

12 აგვისტოს მონაცემებით, საქართველოში კორონავირუსის 5 128 ახალი შემთხვევა დადასტურდა, გამოჯანმრთელდა 3 310, ხოლო გარდაიცვალა — 49 ადამიანი.

ბოლო 24 საათში ქვეყნის მასშტაბით ჩატარდა 49 189 კვლევა ტესტით, მათ შორის, 29 357 კვლევა ანტიგენის ტესტით და 19 832 PCR ტესტით.

რაც შეეხება დადებითობის მაჩვენებელს, 12 აგვისტოს მდგომარეობით, დადებითობის დღიური მაჩვენებელი არის 10,43%, ბოლო 7 დღის მანძილზე — 10,52%, ხოლო 14 დღის მანძილზე — 9,63%.