შინაგან საქმეთა სამინისტროს პრესსამსახურის ცნობით, შს მინისტრი გიორგი მღებრიშვილი უკვე ბათუმში იმყოფება.

მან გამგზავრებამდე ჟურნალისტებთან კომენტარი გააკეთა და ბათუმსი მიმდინარე მოვლენები შეაფასა. მისი თქმით, ის რაც ბათუმში ხდება მიუღებელია:

"მსგავსი პროვოკაციული მოქმედებები ვერავითარ შემთხვევაში ვერ შეუშლის ხელს კანონის აღსრულებას, სამართალდამცავთა მუშაობას. ყველა ის პირი ვინც თავის თავს კანონზე მაღლა აყენებს უმკაცრესად დაისჯება. ჩვენ ყველა თანასწორები ვართ კანონის წინაშე".

ბათუმის ქუჩებში საპროტესტო აქცია რამდენიმე საათია მიმდინარეობს. აქციის მონაწილეების ნაწილი ბათუმში წვავს პოლიციის ავტომობილებს, საბურავებს, ისვრის ქვებს, პოლიციის შენობის მისამართით.

11 მარტს პატრულმა მოძრაობის შეფერხებისთვის მოქალაქე დააჯარიმა, რასაც სიტყვიერი და ფიზიკური დაპირისპირება, მოგვიანებით კი საპროტესტო აქცია მოჰყვა.