ქართული ოცნების წევრმა, დავით ბაციკაძემ საზოგადოებრივი მაუწყებლის პირველი არხის ეთერში პირდაპირი ჩართვისას თქვა, რომ დაკავებულები, რომელთა გამოც ბათუმში საპროტესტო აქცია დაიწყო, უკვე გათავისუფლებული არიან.

ბაციკაძის ინფორმაციით, ინფორმაცია აღნიშნული პირების გათავისუფლების შესახებ, მიაწოდეს აქციის მონაწილეებს, მაგრამ მათ "არ აინტერესებთ აღნიშნული".

როგორც მმართველი პარტიის წარმომადგენელი ამბობს, მისი აზრით, საპროტესტო ჯგუფები კონკრეტული პარტიის მიერ არიან ორგანიზებული.

შს მინისტრმა, გიორგი მღებრიშვილმა ბათუმში გამგზავრებამდე ჟურნალისტებს უთხრა, რომ მან გაითვალისწინა აჭარის მთავრობის თხოვნა და დაკავებულები გაათავისუფლა.

ყველაფერი იმით დაიწყო, რომ 11 მარტს პატრულმა მოძრაობის შეფერხებისთვის მოქალაქე დააჯარიმა, რასაც სიტყვიერი და ფიზიკური დაპირისპირება, მოგვიანებით კი საპროტესტო აქცია მოჰყვა.

უკვე რამდენიმე საათია, ბათუმში ადამიანთა ჯგუფები წვავენ პოლიციის ავტომობილებს, საბურავებს, ისვრიან ქვებს.