პრემიერმინისტრი ირაკლი ღარიბაშვილი ქვეყანაში შექმნილ მძიმე ვითარებას ოპოზიციური არხების მიერ მოგონილს უწოდებს. ის ამბობს, რომ განსაკუთრებული არაფერი ხდება.

"ვუყურებ რა, ამ ოპოზიციურ არხებს, თავი მოგეჩვენებათ მსოფლიოს ბოლო დღეებში, აპოკალიფსია პირდაპირ. მთელს მსოფლიოში ეს ხდება, მეგობრებო, ევროპაში, ყველგან. მანამდე მომადგნენ, ყოველდღე აქციებს მიტარებდნენ, ყოველდღე მოწოდება იყო, რომ გააუქმეთ კომენდანტის საათი და ობიექტურად ხალხი იყო შეწუხებული. მაშინ რეალურად ხალხს სჭირდებოდა, მით უმეტეს, გაზაფხული იყო, ზაფხული მოვიდა, სჭირდებოდა ნორმალური, მით უმეტეს, გავხსენით რა, ჩვენი ეკონომიკა, ამას სჭირდებოდა ამოძრავება და ხალხს უნდა დაეწყო ისევ სამუშაოზე გასვლა, ეს გავაკეთეთ. შემდეგ გავითვალისწინე მე მოსახლეობის ჩივილი და მაშინ, როცა სტაბილური სიტუაცია იყო და ვაქცინების შემოტანაც დავიწყეთ, გავაუქმეთ პირბადის ტარებაც, დროებით, მაგრამ ვაკვირდებოდით სიტუაციას,“ — განაცხადა ღარიბაშვილმა.

აღსანიშნავია, რომ არსებული მძიმე მდგომარეობის ოპოზიციური არხების მიერ მოგონილად გამოცხადება ჯერ კიდევ ქართული ოცნების ლიდერმა, ბიძინა ივანიშვილმა, დაიწყო.

"დღეს რომ გამოვრთოთ რუსთავი 2, ქვეყანაში აღმავლობის მეტს ვერაფერს ნახავთ", — ამ შინაარსის განცხადება ივანიშვილს ქართული ოცნების ხელისუფლებაში მოსვლის შემდეგ არაერთხელ აქვს გაკეთებული.