ჯანდაცვის მინისტრის მოადგილის, თამარ გაბუნიას განცხადებით კორონავირუსის ე.წ. დელტა შტამს უფრო მეტად დამაზიანებელი ეფექტი მაღალი ასაკის მოსახლეობაში აქვს. გაბუნია ამ დასკვნას კლინიკური ჯგუფის სტატისტიკურ მონაცემებზე დაყრდნობით აკეთებს.

"გასული ტალღიდან გამომდინარე, კვლავაც სიკვდილობის მატება აღინიშნება მაღალ ასაკობრივ ჯგუფში. 80 წლის ზემოთ ასაკობრივ ჯგუფში არის პროპორციულად უფრო მეტი გარდაცვალება მიმდინარე ტალღის პირობებში, ვიდრე ეს იყო გასული ტალღის პირობებში", — განაცხადა თამარ გაბუნიამ.

ჯანდაცვის მინისტრის მოადგილე ამბობს, რომ სიკვდილიანობის ზრდა ახალგაზრდებში მიმდინარე ტალღის დროს, ანუ ე.წ. დელტა შტამის მასობრივი გავრცელების პირობებში არ ფიქსირდება.

"ახალგაზრდებში გარდაცვალების მატების ტენდენცია არ ფიქსირდება.

ზოგადად, საერთო სიკვდილობა რჩება იგივე პროცენტულ მაჩვენებელში. ანუ, საერთო სიკვდილობა არ არის მიმდინარე ტალღაზე და თუ არის, პროპორციულად იზრდება რაოდენობა, ისევ და ისევ ხანდაზმული ასაკის ჯგუფში. რაც ნიშნავს იმას, რომ როგორც ჩანს, დელტა ვირუსს მაინც მეტი დამაზიანებელი ეფექტი ახასიათებს ისევ და ისევ მაღალი ასაკის მოსახლეობაში და კიდევ უფრო მეტად უნდა გავფრთხილდეთ ამ მიმართულებით", — განაცხადა თამარ გაბუნიამ.

რაც შეეხება ბავშვებს, გაბუნიას თქმით, მიმდინარე ტალღის დროს მათი ინფიცირების მაჩვენებელი გაიზარდა, თუმცა შემთხვევები ძირითადად მსუბუქი ან საშუალო სიმძიმისაა.

"ბავშვების [ინფიცირების] პროპორციული რაოდენობა, ანუ 18 წლამდე ასაკობრივი ჯგუფის, მოიმატა მიმდინარე ტალღაში. ამის ასახვა იყო ისიც, რომ ჩვენ დავამატეთ ჰოსპიტალური საწოლები ბავშვთა ასაკის პოპულაციისთვის, მაგრამ, ბოლო პერიოდში იკვეთება ისიც, რომ ბავშვთა საწოლები არ არის დატვირთული, რაც ნიშნავს იმას, რომ შემთხვევებს უდიდესი ნაწილი არის მსუბუქი, საშუალო სიმძიმის და ოჯახები უკვე თანახმა არიან, რომ ბავშვი მართონ ბინაზე ან კოვიდსასტუმროში", — განაცხადა თამარ გაბუნიამ.

დელტა შტამის მახასიათებლებზე ისაუბრა გუშინ იაშვილის კლინიკის დირექტორმა, ივანე ჩახიძემაც. ჩხაიძის თქმით, ე.წ. დელტა შტამის მიმდინარეობა ორგანიზმში უფრო მძიმეა, შესაბამისად, უფრო მეტად განაპირობებს სიკვდილს, ვიდრე ე.წ. ბრიტანული ვარიანტი.

5 აგვისტოს, დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორის მოადგილემ, პაატა იმნაძემ განაცხადა, რომ ქვეყნის მასშტაბით დაფიქსირებული შემთხვევების დაახლოებით 80% დელტა შტამია. მისივე ინფორმაციით, თბილისსა და ბათუმში, ანუ ქალაქებში, სადაც, ჩვეულებრივ, ყველაზე მაღალია ინფიცირების მაჩვენებლები, თითქმის 100%-ით დელტა შტამი ფიქსირდება.