საერთაშორისო გამჭვირვალობა - საქართველო საზოგადოებრივი მაუწყებლის თანამშრომელთა ნაწილის პროტესტს გამოეხმაურა. ორგანიზაცია სოციალურ ქსელში გავრცელებულ განცხადებაში წერს, რომ საზოგადოებრივი მაუწყებლის თანამშრომლებსა და მენეჯმენტს შორის კომუნიკაციის პრობლემა გამოიკვეთა:

"მენეჯმენტმა უარი განაცხადა 18 მაისს გადაცემა “რეალურ სივრცეში” მისივე ორგანიზაციის თანამშრომლებთან ერთად მიეღო მონაწილეობა საკითხის საჯარო განხილვაში, რაც კიდევ უფრო ართულებს მხარეთა შორის კონსტრუქციული თანამშრომლობის შესაძლებლობას".

TI-ს რეკომენდაციით, პროცესში აქტიურად და ოპერატიულად უნდა ჩაერთოს სამეურვეო საბჭოს სრული შემადგენლობა და არა მისი ცალკეული წევრები. ასევე, მსგავს სიტუაციებში საბჭოს მუშაობის წარმმართველი უნდა იყოს არა ფორმარული პროცედურები არამედ, პრობლემის გადაჭრაზე ორიენტირებული ქმედითი ნაბიჯები.

მსგავს სიტუაციებში საბჭოს მუშაობის წარმმართველი უნდა იყოს არა ფორმარული პროცედურები არამედ, პრობლემის გადაჭრაზე ორიენტირებული ქმედითი ნაბიჯები

განცხადებაში ნათქვამია, რომ საზოგადოებრივი მაუწყებლის თანამშრომლებს უნდა ჰქონდეთ სამართლიანი და უსაფრთხო სამუშაო გარემო:

"თანამშრომლების მხრიდან პროტესტის გამოხატვა მათი უფლებაა და საზოგადოებრივი მაუწყებლის ხელმძღვანელობამ ამ პერიოდში განსაკუთრებით უნდა იზრუნოს თანამშრომლების უსაფრთხოებასა და მათი შრომითი უფლებების დაცვაზე. საზოგადოებრივი მაუწყებლის ხელმძღვანელობამ და სამეურვეო საბჭომ საკუთარი რესურსები უნდა მიმართონ თანამშრომლების პრობლემების სიღრმისეული გაცნობისა და მათთან შეთანხმების მიღწევისაკენ".

საზოგადოებრივი მაუწყებლის თანამშრომელთა ნაწილმა, რომელთა შორის არიან მოამბის ჟურნალისტები, მემონტაჟეები და ტექნიკური პერსონალი, დღეს, 18 მაისს, მაუწყებლის წინ გამაფრთხილებელი აქცია გამართა. ისინი მაუწყებლისგან სამუშაო პირობების გაუმჯობესებასა და ხელფასების მომატებას ითხოვენ.