ნაციონალური მოძრაობის თავმჯდომარე და თბილისის მერობის კანდიდატი, ნიკა მელია აცხადებს, რომ წინასაარჩევნო კამპანიისას ქალაქში ბილბორდებს არ გააკრავს. მან თბილისის მოქმედი მერი და ასევე მომავალი მერობის კანდიდატი ქართული ოცნებიდან, კახა კალაძე კორუფციაში დაადანაშაულა და განაცხადა, რომ მისი ბილბორდები "მოპარული ფულითაა" დამზადებული.

"არცერთი ბილბორდი მე წელს არ მექნება. მიმაჩნია, რომ ქალაქში, სადაც ყველაფერი უკუღმა კეთდება; ქალაქში, რომელიც ნაგვითაც ყარს; ქალაქში, სადაც ჟურნალისტებს სცემენ; ქალაქში, სადაც ეპიდემიას ვერ ებრძვიან, იმიტომ, რომ როგორც მინიმუმ, არიან უსუსურები, არა მაქვს მე უფლება ძვირადღირებული ბილბორდი გავაკრა. ბილბორდების გარეშე დავამარცხებთ კორუმპირებულ [კახა] კალაძეს და კორუმპირებულ [ირაკლი] ხმალაძეს. დიახაც, ბილბორდების გარეშე დავამარცხებთ ამ მართლაც ენით აღუწერელ, კორუმპირებულ მაღალი თანამდებობის პირებს", — განაცხადა ნიკა მელიამ.

ადგილობრივი თვითმმართველობის არჩევნები 2 ოქტომბერს გაიმართება.