უკვე 10 დღეა თურქეთში მასშტაბური ხანძარს ებრძვიან. არსებული ინფორმაციით, 28 ივლისის შემდეგ, თურქეთის ეგეოსისა და ხმელთაშუა ზღვის სანაპიროების თითქმის მთელ პერიმეტრზე გაჩნდა ხანძრის დაახლოებით 180 კერა, დაიღუპა 8 ადამიანი.

ხანძრის გავრცელების მიზეზად მაღალი ტემპერატურა და ქარი სახელდება. ბოლო ათწლეულის განმავლობაში ეს ხანზარი ყველაზე მასშტაბურია ქვეყანაში. 30 პროვინციაში გაჩენილი კერების მხოლოდ ნაწილია ლიკვიდირებული. თურქეთის პრეზიდენტის, რეჯეფ თაიფ ერდოღანის განცხადებით, ხანძრის ერთ-ერთი კერა ბავშვების დაუდევრობით გაჩნდა.

ფოტო: Anadolu Agency / Getty Images

უკვე ათი დღეა ცეცხლი ტყის დიდ მასივს უკიდია, ამ დროის განმავლობაში დაზარალდა ასობით ადამიანი და დაინგრა ან დაზიანდა შენობები. პრობლემური რეგიონებიდან მიმდინარეობს მოსახლეობის ევაკუაცია.

ფოტო: Reuters

ოთხშაბათს, 4 აგვისტოს სამხრეთ-დასავლეთ თურქეთში ელექტროსადგურში ძლიერი ხანძარი გაჩნდა, გამოცხადდა ევაკუაცია. მეხანძრე-მაშველებმა შეძლეს ჩაექროთ Kemerkoy-ს ქარხანაში გაჩენილი ხანძარი. The Guardian-ის ინფორმაციით, ყველა ასაფეთქებელი ქიმიკატი და საშიში მასალები ამოღებულია ყველა სტრატეგიული ადგილიდან, სადაც შესაძლოა, გაჩნდეს ხანძარი.

ფოტო: Ali Ballı / EPA

გარდიანი ევროკავშირის კოსმოსური სააგენტოს მონაცემებზე დაყრდნობით, წერს რომ "გამოსხივების სიმძლავრემ" — ხანძრის ინტენსივობამ მიაღწია უპრეცენდენტო ნიშნულს. თურქეთის ერთ-ერთ ქალაქში, მარმარისში ტემპერატურამ ყველა დროის რეკორდს, 45,5 გრადუსს მიაღწია.

თურქეთის დასახმარებლად ევროკავშირმა სამი სახანძრო-სამაშველო თვითმფრინავი გაგზავნა. რუსეთმა, უკრაინამ, აზერბაიჯანმა და ირანმა ასევე გაგზავნეს თურქეთში წყლის ბომბდამშენები. მეზობელ ქვეყანას დახმარება საქართველომაც შესთავაზა.