საქართველოს პარლამენტმა მესამე მოსმენით მხარი დაუჭირა საკანონმდებლო პაკეტს, რომლის მიხედვითაც საქართველოს ეროვნულ ბანკს საფინანსო სექტორზე ზედამხედველობის ფუნქცია უბრუნდება. ამით ეროვნულმა ბანკმა ის ფუნქციები დაიბრუნა, რომლის ჩამორთმევის გადაწყვეტილებაც პარლამენტმა 2015 წელს მიიღო. დღევანდელ კენჭისყრაზე პარლამენტმა საკანონმდებლო პაკეტი ხმათა უმრავლესობით მიიღო.

2015 წელს ეროვნული ბანკისგან საზედამხედველო ფუნქციების გამოყოფას ეროვნული ბანკი და ოპოზიციური პარტიები ეწინააღმდეგებოდნენ. კანონს საქართველოს პრეზიდენტმა ვეტო დაადო, რომელიც მოგვიანებით პარლამენტმა დაძლია. მოგვიანებით, კანონი საკონსტიტუციო სასამართლოში გასაჩივრდა, რომელმაც საზედამხედველო ფუნქციების სააგენტოს უფლებამოსილება შეუჩერა.