ირაკლი ღარიბაშვილი ქვეყნის ჩაკეტვას მიუღებლად მიიჩნევს და ამბობს, რომ ამ გზით ვირუსის მხოლოდ დროებით შეყოვნებაა შესაძლებელი. პრემიერი აღნიშნავს, რომ ვირუსის შეჩერაბა მხოლოდ ვაქცინაციას შეუძლია.

"არ გავაჩეროთ, არ დავკეტოთ ქვეყანა ხელმეორედ და ის მძიმე შედეგები არ გამოვიწვიოთ, რაც ჩვენ ყველამ ერთად გამოვცადეთ გასულ წელს. ჩაკეტვით ვირუსს ვერ დავამრცხებთ. შეიძლება დროებით მოხდეს შეყოვნება, მაგრამ საბოლოო ჯამში ვირუსს ამარცხებს ვაქცინაცია".

ღარიბაშვილი ეკონომიკის შეჩერებას მცდარ გზას უწოდებს და ამბობს, რომ ქვეყანაში ყველა საშუალება არის ამის ასარიდებლად.

"ჩვენ გადავწყვიტეთ მყარად და ვთქვით, რომ ამ ვითარებაში, როცა ქვეყანამ შემოიტანა 2 მლნ დოზაზე მეტი ვაქცინა ჯამში, ჩვენ ერთ თვეში გვექნება მთლიანობაში 3 მლნ-ზე მეტი ვაქცინა, რა თქმა უნდა, აბსოლუტურად გაუმართლებელია ქვეყნის ხელახლა ჩაკეტვა. ჩვენ ეკონომიკას არ შევაჩერებთ, ეს არის მცდარი გზა, შესაბამისად, კიდევ ვუბრუნდებით მთავარ თემას, რომ ვაქცინაცია პირდაპირ უკავშირდება ჩვენი ქვეყნის მაღალ ეკონომიკურ ზრდას", — განაცხადა მან.

5 აგვისტოს მონაცემებით, საქართველოში კორონავირუსის 3 670 ახალი შემთხვევა დადასტურდა, გამოჯანმრთელდა 2 626, ხოლო გარდაიცვალა — 38 ადამიანი. პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 436 573-ს, ჯამში გამოჯანმრთელებულთა რაოდენობა გაიზარდა 393 453-მდე, ხოლო ვირუსს ჯამში 5 986 პირი ემსხვერპლა.