როცა ხანგრძლივ და შრომატევად საქმეს დაასრულებ, თანაც წარმატებით, უკვე თამამად შეგიძლია საკუთარ თავს გართობის, ან თუნდაც ჰობით დაკავების უფლება მისცე. ამიტომ არ უყოყმანია ტოკიოს ოლიმპიური თამაშების ჩემპიონს, ტომ დეილის, როდესაც წყალში 3 მეტრის ტრამპლინიდან ხტომაში ქალების კატეგორიის ფინალს საქსოვი ჩხირებით მიაშურა.

ფოტოზე, რომელიც ინტერნეტში ვირუსულად გავრცელდა, ჩანს, როგორ ადევნებს 27 წლის სპორტსმენი დაძაბულ ფინალს თვალს; თუმცა, ნაქსოვსაც გულდასმით აკვირდება და ცდილობს, თვალი არ დაეშალოს.

ფოტო: BBC

სხვათა შორის, დეილიმ, რომელმაც ტოკიოს თამაშებზე პირველობა მოიპოვა, ცოტა ხნის წინ თავის ოქროს მედალსაც მოუქსოვა ჩასადები პაწაწინა ჩანთა. როგორც ჩანს, ქსოვა დიდი ხანია, ტომის ჰობია და ამ გატაცებას სპორტსმენმა ინსტაგრამგვერდიც კი მიუძღვნა, სადაც გამომწერებს თავისი ნაქსოვი ნივთების ფოტოებს უზიარებს.

"ქსოვის და ყაისნაღის გამოყენების სწავლა დიდად დამეხმარა ოლიმპიადის განმავლობაში, ჩვენ კი ოქროს მედალიც მოვიგეთ", — დაწერა დეილიმ გამარჯვების შემდეგ.

თუმცა, დეილი წლევანდელ ოლიმპიადაზე ყურადღების ცენტრში მხოლოდ ოქროს მოგებით ან ქსოვით არ მოქცეულა. გამარჯვების შემდეგ მის მიერ წარმოთქმულმა სიტყვამ ინტერნეტში ასევე დიდი გამოხმაურება გამოიწვია.

"საოცრად ვამაყობ, რომ ვარ გეი და ასევე ვარ ოლიმპიური ჩემპიონი", — განაცხადა ტომმა, — "როცა პატარა ვიყავი, არასდროს მეგონა, რომ, იმის გამო, ვინც ვიყავი, ამას მივაღწევდი. ახლა, როცა ოლიმპიური ჩემპიონი ვარ, ეს ნიშნავს, რომ ყველაფრის მიღწევა შეგიძლია.

"ვიმედოვნებ, ყველა ახალგაზრდა ლგბტქ ადამიანი დაინახავს, რომ, მიუხედავად იმისა, რამდენად მარტოსულად გრძნობ ახლა თავს, მარტო არ ხარ. ყველაფრის მიღწევა შეგიძლია".

დეილისთვის ეს მეოთხე ოლიმპიადა, თუმცა, პირველი ოქროს მედალია. მან ბრინჯაოს მედლების მოპოვება 2012 და 2016 წლებში შეძლო ლონდონისა და რიოს ოლიმპიურ თამაშებზე.