საპატრიარქოს ტელევიზიის თანამშრომლებმა ილია მეორეს მიმართეს და მიტროპოლიტ პეტრე ცაავას ტვ ერთსულოვნების დირექტორის თანამდებობაზე დატოვება სთხოვეს. განცხადება ტელევიზიის თანამშრომლებმა ერთსულოვნების ეთერში გააკეთეს:

„გამოვთქვამთ უდიდეს პატივისცემას და მადლიერებას მიტროპოლიტ პეტრესადმი, რომელიც 8 წლის განმავლობაში ღირსეულად მართავდა ტელევიზიას. ტელეკომპანია ერთსულოვნება დღემდე ემსახურებოდა სარწმუნოებრივ და ეროვნულ ფასეულობებს. იმედი გვაქვს, რომ ის შრომა და ღვაწლი, რაც მეუფემ ამ წლების განმავლობაში გასწია ტელევიზია ერთსულოვნების განვითარების საქმეში მომავალში დაფასდება. უმორჩილესად ვთხოვთ სრულიად საქართველოს კათოლიკოს-პატრიარქს უწმინდესსა და უნეტარეს ილია მეორეს გაითვალისწინოს ტელეკომპანიის თითოეული თანამშრომლის უდიდესი სურვილი და საპატრიარქოს ტელევიზია ერთსულოვნების დირექტორის თანამდებობაზე დატოვოს ჭყონდიდელი მიტროპოლიტი პეტრე.“

ჭყონდიდის მიტროპოლიტ პეტრეს საპატრიარქოს ტელევიზიის დირექტორის თანამდებობა დღეს, 9 მარტს გამართულ სინოდის სხდომაზე ჩამოართვეს. ცაავამ მოგვიანებით განაცხადა, რომ გადაწყვეტილება, რომ ტელევიზიას სხვამ უნდა უხელმძღვანელოს ილია მეორემ პირადად მიიღო.