მთავარი არხის გენერალური დირექტორის, ნიკა გვარამიას განცხადებით, მთავარი არხი გამოდის სპეციალური რეჟიმით მუშაობის მდგომარეობიდან და უბრუნდება მწვავე კრიტიკული გაშუქების რეჟიმს.

"მთელმა ამ პერიოდმა, მედიის მუშაობამ შეასრულა ისტორიული როლი და გადამწყვეტი როლი, ჩემი აზრით, ქართული ოცნების რეჟიმის დამარცხებაში. ქართული ოცნების რეჟიმის დამარცხებია მთავარი წინაპირობა არის მისი სახის სრული გაშიშვლება, რაც ბოლომდე მედიის დამსახურებაა და ბოლო თვის უწყვეტი სოლიდარული და პროფესიონალური კამპანიის. შექმნილი ვითარებიდან გამომდინარე, საკითხმა მიიღო უკვე მკაფიოდ პოლიტიკური ხასიათი. მედიამ, მე ვფიქრობ და ჩემი არხის სახელით ვაცხადებ, რომ უმაღლეს დონეზე შეასრულა საკუთარი ფუნქცია. გამომდინარე იქიდან, რომ როგორც აღვნიშნე, პროცესებმა უკვე მიიღო მკაფიოდ პოლიტიკური ხასიათი, ჩვენ გამოვდივართ იმ სპეციალური რეჟიმით მუშაობის მდგომარეობიდან და ვუბრუნდებით მწვავე კრიტიკული გაშუქების რეჟიმს", — განაცხადა გვარამიამ.

მისივე თქმით, საკითხმა მკაფიოდ პოლიტიკური ელფერი მიიღო და ეს ბრძოლა პოლიტიკოსების მოსაგებია.

"საკითხმა მიიღო მკაფიოდ პოლიტიკური ელფერი, შესაბამისად ეს სივრცე და ეს ბრძოლა უკვე არის პოლიტიკოსების მოსაგები. საქართველო არის პოლიტიკოსების გადასარჩენი. ეს არის მკაფიოდ პოლიტიკური ბრძოლა, რაც დღეს რუსეთთან პრაქტიკულად შეერთების და დიქტატურის დამყარების დეკლარაციით გააკეთა ქართულმა ოცნებამ. თავისთავად ცხადია, მთავარი არხი, იმედი მაქვს სხვა ოპოზიციური ტელევიზიებიც, ამ ბრძოლაში იდგებიან არა პატრიოტული მედასავლეთე პოლიტიკური პარტიების გვერდით, არამედ იდგებიან საქართველოს და მისი ინტერესების გვერდით", — თქვა მთავარი არხის გენერალურმა დირექტორმა.

გვარამიამ, ასევე, განაცხადა, რომ მათ აქვთ ინფორმაცია იმის შესახებ, რომ აგვისტოში ხელისუფლება შეეცდება ოპოზიციური მედიების გაჩუმებას, დახურვას და ის მოუწოდებს საერთაშორისო თანამეგობრობას, ელჩებსა და საერთაშორისო ორგანიზაციებს, რომ მუდმივი მონიტორინგის ქვეშ იყოს ქართული ოცნების ხელისუფლება.

რამდენიმეთვიანი პოლიტიკური კრიზისის შემდეგ ევროკავშირის მედიაციითა და შარლ მიშელის პირადი ჩართულობით მიღწეული შეთანხმება ანულირებულია. ეს გადაწყვეტილება მმართველმა გუნდმა მიიღო, ბრალი კი ტრადიციულად ოპოზიციას დასდო. შესაბამისად, ქართული ოცნება უარს ამბობს აქამდე დაპირებულ 43%-იან ბარიერზე და აცხადებს, რომ ახალი არჩევნები მათი "კეთილი ნებით" 53%-ის მიღების შემთხვევაში ჩატარდება, თუ გადაწყვეტენ, რომ ოპოზიცია მზად არის კოალიციური მმართველობისთვის. შარლ მიშელის შეთანხმების ერთ-ერთი მთავარი ჩანაწერი სწორედ 43%-იანი ბარიერი იყო, რაც იმას ნიშნავდა, რომ თუ ქართულ ოცნებას თვითმმართველობის არჩევნებზე ამაზე ნაკლები შედეგი ექნებოდა, რიგგარეშე არჩევნები უნდა ჩატარებულიყო. ახლა ეს დათქმა აღარ არსებობს.