ქართული ოცნების დეპუტატი დავით კაჭარავა ფიქრობს, რომ მედიის წარმომადგენლებზე ზეწოლა არ არის. ის არ ეთანხმება არც იმ მოსაზრებას, რომ მმართველი გუნდის წევრების განცხადებები ჟურნალისტებზე ძალადობას ახალისებს.

"ვერ დაგეთანხმებით, ვერ დაგეთანხმებით. არ ვფიქრობ, არ ვფიქრობ, რომ მედიაზე ზეწოლაა", — მხოლოდ ამ ფრაზებით შემოიფარგლა დეპუტატი, როცა მას ჟურნალისტები კითხვებს უსვამდნენ.

მედიის წარმომადგენლების მიმართ აგრესია, თავდასხმა და ცინიკური დამოკიდებულების გამოხატვა უკვე თითქმის ყოველ დღე ხდება. ჟურნალისტებს თავს ესხმის არამხოლოდ მოქალაქეთა ნაწილი, არამედ მმართველი გუნდის წევრები, მათ შორის, მინისტრი თეა წულუკიანი.

5-6 ივლისის ძალადობრივი მოვლენებისა და ნაცემი ოპერატორის, ლექსო ლაშქარავას გარდაცვალების შემდეგ, მედიამ საპროტესტო აქციები დაიწყო და პრემიერმინისტრის გადადგომა მოითხოვა. ირაკლი ღარიბაშვილი არ გადადგა, ქართულმა ოცნებამ კი კრიტიკულ ტელევიზიებს ბოიკოტი გამოუცხადა და კოლეგის სიკვდილით სპეკულაციაში დაადანაშაულა.

მედიის საკითხებზე მომუშავე არაერთმა არასამთავრობო ორგანიზაციამ აღნიშნა, რომ ხელისუფლების განცხადებები და ქმედებები ჟურნალისტებზე ძალადობას ახალისებს, რაც დაუშვებელია.

გაიგეთ მეტი: