მართა ტაკერი, რომელსაც 4 შვილი, 11 შვილიშვილი, 18 შვილთაშვილი და ერთი შვილთაშვილის შვილი ჰყავს, თეთრ საქორწინო კაბაზე ყოველთვის ოცნებობდა. სამწუხაროდ, 1952 წელს, როდესაც დაოჯახდა, ამ ნატვრის ასრულება ვერ შეძლო. მიზეზი 1950-იან წლებში ალაბამაში მოქმედი კანონები იყო, რომლის მიხედვითაც, შავკანიან ადამიანებს თეთრკანიანი ადამიანების დაწესებულებებში შესვლა ეკრძალებოდათ. ამის გამო მართამ საქორწინო კაბის ყიდვა ვერ შეძლო.

"კაბის ყიდვაზე არც კი მიფიქრია, რადგან ვიცოდი, რომ მაღაზიაში შესვლა არ შემეძლო...ეს ყოველთვის მასევდიანებდა, რადგან ვგრძნობდი, რომ მისი ჩაცმის უფლება უნდა მქონოდა,", — ამბობს მართა.

ფოტო: Angela J D Strozier

ეს ისტორია მართამ შვილიშვილს, ანჯელას Coming To America-ს ყურების დროს უამბო. მართამ ისიც აღნიშნა, რომ საქორწინო კაბის ჩაცმაზე ყოველთვის ოცნებობდა. ანჯელამ გადაწყვიტა, ბებიის ოცნება ქორწინებიდან 70 წლის შემდეგ აესრულებინა.

ანჯელამ მაღაზიაში ვიზიტი დაჯავშნა, მანამდე კი ბებია ლანჩზე დაპატიჟა, შემდეგ კი მაკიაჟიც გაუკეთა. ადგილზე მისულმა მართამ კაბები განსაკუთრებული ყურადღებით დაათვალიერა და ორი რჩეული მოდელი მოირგო.

ფოტო: Angela J D Strozier

ფოტო: Angela J D Strozier

"თავი ნამდვილ პატარძლად ვიგრძენი. ძალიან მინდოდა, ეს კაბა მაშინ მცმოდა, როდესაც დავქორწინდი. მინდოდა, რომ მას ამ კაბაში ვენახე", — ამბობს მართა ქმარზე, რომელიც 1975 წელს გარდაიცვალა.

ფოტო: Angela J D Strozier

ფოტო: Angela J D Strozier

მართა ვიზიტითა და კაბების მორგებით კმაყოფილი დარჩა. მართალია, ცოტათი დააგვიანდა, მაგრამ, სჯობს გვიან, ვიდრე — არასდროს.

"ყოველთვის ვამბობდი, რომ სანამ ამ სამყაროდან წავიდოდი, საქორწინო კაბას მოვირგებდი და მიხარია, რომ ასეც მოვიქეცი", — აცხადებს ბედნიერი მართა.