23 ივლისი სპორტის მოყვარულებისთვის განსაკუთრებული თარიღია — 2020 წლის ტოკიოს ოლიმპიური თამაშები, რომელიც პანდემიის გამო ერთი წლით გადაიდო, როგორც იქნა, იწყება. საერთაშორისო სპორტულ მოვლენას არც საქართველო გამოაკლდება.

ტოკიოს ოლიმპიურ თამაშებზე ჩვენს ქვეყანას სხვადასხვა სპორტის სახეობაში წარმატებული და სასახელო სპორტსმენები წარადგენენ. მათი წარმატებების შესახებ საქართველოს ბანკი, რომელიც საქართველოს ეროვნული ოლიმპიური ნაკრების გენერალური სპონსორია, საკუთარ facebook გვერდზე საზოგადოებას ხშირად უყვება.

იმისათვის, რომ ოლიმპიური თამაშების წინ განსაკუთრებული განწყობა შეგიქმნათ, რომლითაც საქართველოს უგულშემატკივრებთ, გვინდა ის 10 ქართველი სპორტსმენი შეგახსენოთ, რომელსაც ჩვენც უნდა ვიცნობდეთ და — მსოფლიოც.

1. ლაშა შავდათუაშვილი

ქართველი ძიუდოისტი ლაშა შავდათუაშვილი ოლიმპიური თამაშების წარმატებული მოასპარეზეა. ის 2012 წლის ოლიმპიური თამაშების ჩემპიონი და 2016 წლის ოლიმპიური თამაშების მესამე პრიზიორია. ლაშას ევროპისა და მსოფლიოს ჩემპიონის ტიტულებიც აქვს მოპოვებული.

2. ნინო სალუქვაძე

ნინო სალუქვაძე ქართველი მიზანში მსროლელი და რვა ოლიმპიადის მონაწილეა. ნინო სამგზის ოლიმპიური მედლის მფლობელი, ოთხგზის მსოფლიო და ევროპის ხუთგზის ჩემპიონია. ნინო სალუქვაძეს ოცამდე მსოფლიო რეკორდი აქვს დამყარებული.

3. სანდრო ბაზაძე

სანდრო ბაზაძე ქართველი მოფარიკავეა, რომელმაც 2013 წელს ახალგაზრდებს შორის ევროპის ჩემპიონის ტიტული მოიპოვა. სანდრო 23 წლამდელებს შორის ევროპის ჩემპიონი ორჯერ გახდა. ის ევროპის ჩემპიონატის სამგზის ბრინჯაოს მედალოსანიცაა. 2019 წელს სანდრო ბულგარეთში მიმდინარე მსოფლიო თასზე ოქროს მედლის მფლობელი გახდა.

4. ვარლამ ლიპარტელიანი

ვარლამ ლიპარტელიანი ქართული ძიუდოს ერთ-ერთი გამორჩეული სახეა. ის 2012 წლის ოლიმპიური თამაშების მონაწილე და 2016 წლის ოლიმპიური თამაშების ვერცხლის პრიზიორია. ვარლამ ლიპარტელიანი მსოფლიო ჩემპიონატის სამგზის ვერცხლის და ორგზის ბრინჯაოს პრიზიორია. მას ევროპის მასშტაბით განსაკუთრებული წარმატებები აქვს მოპოვებული: ვარლამი ევროპის სამგზის ჩემპიონი, ხუთგზის მეორე და მესამე პრიზიორია.

5. ლუხუმ ჩხვიმიანი

ლუხუმ ჩხვიმიანი საქართველოს სახელით ძიუდოში იასპარეზებს. ლუხუმი საქართველოს სამგზის ჩემპიონი და ვერცხლის პრიზიორია, თუმცა მისი წარმატებები ქვეყნის მასშტაბსაც გასცდა და ის მსოფლიოს, ევროპისა და ევროპული თამაშების ჩემპიონის ტიტულებსაც ატარებს. 2019 წელს ლუხუმი საქართველოს საუკეთესო სპორტსმენთა შორის დაასახელეს.

6. გენო პეტრიაშვილი

გენო პეტრიაშვილი თავისუფალი სტილით ჭიდაობაში ასპარეზობს. ის 2016 წლის ოლიმპიური თამაშების მესამე პრიზიორია. ევროპის ორგზის ჩემპიონს, ორგზის ვერცხლისა და სამგზის ბრინჯაოს პრიზიორს წარმატებები მსოფლიოს მასშტაბითაც აქვს მოპოვებული: გენო მსოფლიოს სამგზის ჩემპიონი და ორგზის მესამე პრიზიორია.

7. ლაშა ტალახაძე

ლაშა ტალახაძე გამორჩეული ქართული ძალოსანია, რომელსაც საერთაშორისო მასშტაბით უამრავი გამარჯვება აქვს მოპოვებული. ლაშა 2016 წელს ჩატარებული ოლიმპიური თამაშების, მსოფლიოს ოთხგზისა და ევროპის ხუთგზის ჩემპიონია. ის მსოფლიოს, ევროპისა და ოლიმპიური რეკორდსმენია. ლაშა ტალახაძე 2016-2019 წლებში საქართველოს საუკეთესო სპორტსმენად დაასახელეს.

8. ეთერ ლიპარტელიანი

ეთერ ლიპარტელიანი პირველი ქართველი ქალია, ვინც ძიუდოში მსოფლიო ჩემპიონი გახდა და ოლიმპიური ლიცენზია მოიპოვა. ეთერი 23 წლამდელებს შორის ევროპის ჩემპიონი, ახალგაზრდებს შორის მსოფლიო ჩემპიონი, ახალგაზრდებს შორის ევროპის ჩემპიონი და ევროპის ზაფხულის XIII ახალგაზრდული ოლიმპიური ფესტივალის ჩემპიონია.

9. გურამ თუშიშვილი

გურამ თუშიშვილი ქართველი ძიუდოსტი, მსოფლიოსა და ევროპის ჩემპიონია. მან 2017 წელს +100 კგ წონით კატეგორიაში ევროპის, ხოლო 2018 წელს იმავე წონით კატეგორიაში მსოფლიო ჩემპიონობა მოიპოვა.

10. სალომე ფაჟავა

მხატვრულ ტანვარჯიშში საქართველოს სალომე ფაჟავა წარადგენს. სალომე მრავალგზის საქართველოს ჩემპიონი, მსოფლიო თასების პრიზიორი და ახალგაზრდული ევროპის ჩემპიონატის ბრინჯაოს პრიზიორია.

უგულშემატკივრე ქართველ ოლიმპიელებს ტოკიოს ოლიმპიურ თამაშებზე. მალე იმასაც მოგიყვებით, როგორ უნდა გამოხატო შენი მხარდაჭერა.