საერთაშორისო სავალუტო ფონდის (IMF) მიერ განახლებული პროგნოზით, საქართველოში 2021 წლის ბოლოს ინფლაციის წლიური მაჩვენებელი 9,4%-ს მიაღწევს, ხოლო მიმდინარე წლის ინფლაციის საშუალო დონე 7,3% იქნება.

IMF-ის ეს მონაცემები ემთხვევა ეროვნული ბანკის მოლოდინებსაც, რომელიც 2021 წლის ბოლომდე მაღალ ინფლაციას პროგნოზირებს.

შეგახსენებთ, რომ მიმდინარე წლის ივნისში წლიური ინფლაცია 9,9% იყო, რაც ფასების საერთო დონის ზრდის ბოლო 10 წლის მაქსიმალური მაჩვენებელია. მაისში ფასების საერთო დონის მაჩვენებელი 7,7%, ხოლო აპრილსა და მარტში — 7,2% იყო.

ინფლაციის დარეგულირების მიზნით, აპრილის მიწურულს ეროვნულმა ბანკმა რეფინანსირების განაკვეთი 1 პროცენტული პუნქტით, 9,5%-მდე გაზარდა, ხოლო ივნისში ეს მაჩვენებელი ამავე დონეზე დატოვა. რეფინანსირების განაკვეთის ზრდის შედეგად, 125 ათასამდე მომხმარებელს სესხის საპროცენტო განაკვეთი 1%-ით გაეზარდა.

აღსანიშნავია, რომ ეროვნული ბანკის მიერ დადგენილი ინფლაციის მიზნობრივი მაჩვენებელი 3%-ია. IMF-ის პროგნოზის მიხედვით, საქართველოში არსებული ინფლაცია ამ მიზნობრივ მაჩვენებელს 2022 წლისთვის დაუახლოვდება.

ასევე იხილეთ: