პრემიერმინისტრმა, ირაკლი ღარიბაშვილმა ჟურნალისტების კითხვა, როდის დატოვებს თანამდებობას, კვლავ უპასუხოდ დატოვა. ეს კითხვა პრემიერმინისტრს ბათუმში, საერთაშორისო კონფერენციის — საქართველოს ევროპული გზა — დაწყებამდე დაუსვეს.

ღარიბაშვილი საუბრობდა კონფერენციის მნიშვნელობაზე, ევროპული საბჭოს პრეზიდენტის, შარლ მიშელის ვიზიტზე და იმაზე, თუ როგორ სრულდება მისი მედიაციით მიღწეული შეთანხმების პირობები, რა დროსაც ჟურნალისტებმა სიტყვა გააწყვეტინეს და ჰკითხეს, როდის აიღებს პასუხისმგებლობას 5-6 ივლისის ძალადობრივ მოვლენებზე.

პრემიერმინისტრმა სცადა სიტყვის გაგრძელება საარჩევნო სისტემასა და მართლმსაჯულების რეფორმაზე, თუმცა ჟურნალისტებმა უთხრეს, რომ მასთან მხოლოდ ერთადერთი კითხვა აქვთ — როდის დატოვებს თანამდებობას. ღარიბაშვილს მოუწია საუბარი შეეწყვიტა და ტრიბუნა დაეტოვებინა.

დღეს ბათუმში ტარდება საერთაშორისო კონფერენცია საქართველოს ევროპული გზა, სადაც აღმოსავლეთ პარტნიორობის ასოცირებული ქვეყნების ლიდერთა შეხვედრა გაიმართება. უკრაინის პრეზიდენტ, ვოლოდომირ ზელენსკისა და მოლდივის პრეზიდენტ, მაია სანდუს გარდა კონფერენციაში მონაწილეობას მიიღებს ევროპული საბჭოს პრეზიდენტი, შარლ მიშელი.

გაიგე მეტი: