ბრიტანელი თეორეტიკოსი ფიზიკოსი სტივენ ჰოკინგი კიდევ ერთხელ გვაფრთხილებს, რომ კაცობრიობა განადგურების საფრთხის წინაშე დგას.

The Times-თან ინტერვიუში ჰოკინგი იმეორებს, რომ კაცობრიობას კლიმატის ცვლილების, ხელოვნური ინტელექტისა და სახეობათა მასობრივი გადაშენების გამო ნათელი მომავალი არ აქვს. ამ ყველაფერს კი ადამიანური აგრესიაც ემატება. ჰოკინგს კაცობრიობის სიცოცხლის დღეების რაოდენობაზე აზრი არ შეუცვლია და მისი თქმით, ჩვენი ცივილიზაცია მომავალ ათას წელიწადში განადგურდება.

"ცივილიზაციის საწყისი პერიოდიდან აგრესია გამოსადეგი იყო, რადგან გადარჩენისთვის უპირატესობას გვაძლევდა. ის ჩვენს გენეტიკურ კოდში დევს", ამბობს ჰოკინგი.

ჰოკინგი ფიქრობს, რომ განვითარების ამ ეტაპზე აგრესიამ, შეიძლება, ბიოლოგიური ან ატომური ომით გაგვანადგუროს. მისი აზრით, კაცობრიობამ ინსტინქტები ლოგიკითა და აზროვნებით უნდა აკონტროლოს, ხოლო პრობლემის გადაჭრის ხერხი, შესაძლოა, მსოფლიო მთავრობის შექმნაც იყოს, მაგრამ ეს შეიძლება ტირანიად იქცეს.

"მე ოპტიმისტი ვარ და მჯერა, რომ კაცობრიობა ადვილად მოერევა ამ გამოწვევას", დასძინა მან.