ნაციონალური მოძრაობის ლიდერი, ნიკა მელია, ამბობს, რომ 5 ივლისს, როდესაც ჰომოფობიურმა და ძალადობრივმა ჯგუფებმა ჟურნალისტებზე იძალადეს, თბილისში არ იმყოფებოდა, მეორე დღეს კი აქციაზე შეგნებულად არ მივიდა, რადგან მისი მისვლა სიტუაციას დაძაბავდა. მელიას მტკიცებით, მისი ჩასვლით სისხლი დაიღვრებიდა და ხელისუფლება დამნაშავედ მას გამოაცხადებდა.

ჟურნალისტის კითხვაზე, სად იყო ოპოზიცია და კონკრეტულად ნაციონალური მოძრაობა მაშინ, როდესაც ჟურნალისტებს ფიზიკურად უსწორდებოდნენ და საპროტესტო აქცია გაიმართა, ნიკა მელიამ განაცხადა, რომ აქციაზე არმისვლა მისი პირადი გადაწყვეტილება იყო.

"სად ვიყავით? სადაც ვართ წლების განმავლობაში, იქ ვიყავით. არაფერი ახალი არ მომხდარა, ქართულმა ოცნებამ საარჩევნო კამპანია გახსნა. პირველ დღეს თბილისში არ ვიყავი. ათ საათზე დაიწყო დარბევა და რომც ვყოფილიყავი, რა უნდა გაგვეკეთებინა. მეორე დღეს დიახაც, ვიყავი თბილისში და რუსთაველის გამზირზე შეგნებულად არ ჩავედი. ეს იყო კონკრეტულად ჩემი პრინციპული გადაწყვეტილება, რომ იქ არ ვყოფილიყავით.

ჩემი იქ ჩასვლა ძალიან გაზრდიდა ძალადობის ალბათობას. მეტიც, დარწმუნებული ვარ, ეჭვიც არ მეპარება, რომ იქ დაიღვრებოდა სისხლი. თანაც ისე დაიღვრებოდა, ქართულ ოცნებას არ გაუჭირდებოდა, ერთ-ერთ მთავარ დამნაშავედ მე გამოვეყვანე", — ამბობს მელია TV პირველის ეთერში.

მანვე აღნიშნა, რომ ყველა უნდა შეეშვას ნიშნისმოგებით საუბარს და იმის კითხვას, თუ სად არის მელია. მისი თქმით, ეს ყველაფერი, მათ შორის ძალადობრივი კონრაქცია ქართული ოცნების საარჩევნო კამპანიის ნაწილია ენმ-სწინააღმდეგ.

ჰომოფობიური და ძალადობრივი ჯგუფების თავდასხმის შედეგად 5-6 ივლისს 50-ზე მეტი ჟურნალისტი დაშავდა. 5 ივლისს დღის განმავლობაში პოლიციას არავინ დაუკავებია. კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დაკავებულების შესახებ ინფორმაცია დღის ბოლოს და მომდევნო დღეებში გავრცელდა.

6 ივლისის ძალადობის გასაპროტესტებლად მდუმარე აქცია გაიმართა, სადაც მოძალადეები მშვიდობიანი აქციის მიმართულებით კვერცხებს, ქვებს, ქვებით სავსე ბოთლებს, რკინის ნაჭრებს, შუშებს და სხვა ნივთებს ისროდნენ. დაშავებულია რამდენიმე პოლიციელიც. პოლიცია მოძალადეებს აკავებდა, თუმცა საღამოს, სამართალდამცავებმა აქციის მონაწილეები და ჟურნალისტები ტერიტორიიდან გაიყვანა და მოძალადე ჯგუფები რუსთაველზე შუეშვა. მათ მეორედ ჩამოგლიჯეს და დაწვეს ევროკავშირის დროშა.

ამ ძალადობრივი მოვლენების გამო სამოქალაქო საზოგაოდებისა და ოპოზიციის ნაწილს მიაჩნია, რომ შინაგან საქმეთა მინისტრის პასუხისმგებლობის საკითხი უნდა დადგეს, რადგან მან ვერ უზრუნველყო მშვიდობიანი მოქალაქეების და ჟურნალისტების უსაფრთხოების დაცვა.