სასულიერო პირი ამართლებს მოძალადე მოპედის მძღოლს, რომელიც ჟურნალისტებს ეჯახებოდა
![](http://rachel.on.ge/2021/07/05/Screenshot_342_60e2c49aaa98f.jpg)
ფოტო: კადრი ვიდეოდან / მაესტრო
სასულიერო პირი ამართლებს მოძალადე მოპედის მძღოლს, რომელიც ჟურნალისტებს მიზანმიმართულად ეჯახებოდა. მეტიც, ის ძალადობაში არა მძღოლს, არამედ ოპერატორს ადანაშაულებს და მანიპულაციურ ვიდეოს ავრცელებს. აღნიშნული პოსტი ამჟამად არ იძებნება, რადგან სასულიერო პირმა ის წაშალა. თუმცა, მანამდე Facebook-მა ეს პოსტი ყალბ ინფორმაციად მონიშნა.
თემა მედიის განვითარების ფონდის ფაქტების გადამოწმების პორტალმა მოიკვლია. მითების დეტექტორის თანახმად, 7 ივლისს სასულიერო პირმა, ანდრია გეწაძემ გამოაქვეყნა ვიდეო, შემდეგი ტექსტით:
"როგორ ურტყამს წიხლს ოპერატორი აქციის მონაწილეს! ეს არის თქვენი უწყინარი მედია ცხვრის ტყავში გახვეული მგლები. დეზინფორმატორი ანტი ქართველები! ქვეყნის შიდა მტრები!"
აღნიშნული სასულიერო პირის მიერ გამოქვეყნებული ვიდეოს ფრაგმენტი 13-წამიანია და მოვლენებს სრულად არ ასახავს. მასში პოლიციელები, ოპერატორები და აქციაზე მყოფი სხვა მოქალაქეები ჩანან, თუმცა არ ჩანს ის, რაც სინამდვილეში მოხდა.
"ვიდეოს ვრცელ ვერსიაში მკაფიოდ ჩანს, რომ ოპერატორი კონტრაქციის მონაწილეს წიხლს მას შემდეგ ურტყამს, რაც ის მოპედით რამდენიმე ჟურნალისტს დაეჯახება. უწყვეტ ვიდეო კადრში მოპედით დაჯახების მომენტი 00:17 წამზე ჩანს, ხოლო 00:22 წამზე ოპერატორი მოპედზე მჯდარ კაცს წიხლს საპასუხოდ ურტყამს", — წერია მითების დეტექტორის ანგარიშში.
შინაგან საქმეთა სამინისტროს ცნობით, მოძალადე პირი, რომელიც 5 ივლისს ჟურნალისტებს მოპედით მიზანმიმართულად ეჯახებოდა, დაკავებულია. ის ერთ-ერთია იმ 3 დაკავებულ პირს შორის, რომელთა შესახებ შსს-მ განცხადება 6 ივლისს გაავრცელა.
ჟურნალისტებზე ძალადობის ფაქტებსა და მათთვის პროფესიული საქმიანობის ხელშეშლის ფაქტებზე განცხადებები საერთაშორისო ორგანიზაციებმა — ჟურნალისტთა დაცვის კომიტეტმა (CPJ), პრესის თავისუფლების გლობალურმა ქსელმა (IPI) და რეპორტიორები საზღვრებს გარეშე (RWB) გააკეთეს.
ჰომოფობიური და ძალადობრივი ჯგუფების თავდასხმის შედეგად 5-6 ივლისს 50-ზე მეტი ჟურნალისტი დაშავდა. 5 ივლისს დღის განმავლობაში პოლიციას არავინ დაუკავებია. კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დაკავებულების შესახებ ინფორმაცია დღის ბოლოს და მომდევნო დღეებში გავრცელდა.
6 ივლისის ძალადობის გასაპროტესტებლად მდუმარე აქცია გაიმართა, სადაც მოძალადეები მშვიდობიანი აქციის მიმართულებით კვერცხებს, ქვებს, ქვებით სავსე ბოთლებს, რკინის ნაჭრებს, შუშებს და სხვა ნივთებს ისროდნენ. დაშავებულია რამდენიმე პოლიციელიც. პოლიცია მოძალადეებს აკავებდა, თუმცა საღამოს, სამართალდამცავებმა აქციის მონაწილეები და ჟურნალისტები ტერიტორიიდან გაიყვანა და მოძალადე ჯგუფები რუსთაველზე შეუშვა. მათ მეორედ ჩამოგლიჯეს და დაწვეს ევროკავშირის დროშა.
ამ ძალადობრივი მოვლენების გამო სამოქალაქო საზოგადოებისა და ოპოზიციის ნაწილს მიაჩნია, რომ შინაგან საქმეთა მინისტრის პასუხისმგებლობის საკითხი უნდა დადგეს, რადგან მან ვერ უზრუნველყო მშვიდობიანი მოქალაქეების და ჟურნალისტების უსაფრთხოების დაცვა.
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
გადახედვა
-
კომენტარები