5 ივლისის ძალადობრივ მოვლენებს უამრავი ადამიანი საჯაროდ გამოეხმაურა, მათ შორის იყვნენ ხელოვანებიც, რომლებიც მხარს უჭერდნენ ლგბტ თემის უფლებებს და ძალადობას აპროტესტებდნენ.

თუმცა, მოხდა პირიქითაც. New One-ის ყოფილმა გიტარისტმა, ლევან შარაშიძემ ფეისბუქზე ჰომოფობიური და ძალადობის წამახალისებელი პოსტები გამოაქვეყნა, რის შემდეგაც ის ქართული ბენდიდან გაუშვეს.

"შეუსაბამოა იყო მუსიკოსი და იყო კომბლე აქციაზე შეძახილებით "გაიძუყნებით ვირთხებო" და ხელებს უქნევდე საკუთარ მოქალაქეებს გძულდეს და მოუწოდო ხალხს ჩაგვრისა და აგრესიისკენ", — სწორედ ამ სიტყვებს ამოიკითხავთ ჯგუფი New One-ის განცხადებაში, რომელიც მათ ფეისბუქზე გამოაქვეყნეს.

განცხადებას თან სდევს ფოტო, რომელშიც ჯგუფის გიტარისტის პოსტი ჩანს, სადაც ის ჰომოფობიურ იდეებს ავრცელებს და ემუქრება არა მხოლოდ ჩვეულებრივ მოქალაქეებს, არამედ სხვადასხვა ქვეყნის ელჩების წარმომადგენლებსაც.

ფოტო: Facebook

ჯგუფის დარჩენილი წევრები საკუთარ განცხადებაში აგრესიას ემიჯნებიან და ასევე ამბობენ, რომ გიტარისტმა უკვე დიდი ხანია უღალატა საკუთარ მუსიკალურ პრინციპებს და ეს ბოლო აკორდი იყო მათ გადაწყვეტილებაში.

თავად ლევან შარაშიძემ თავის ფეისბუქზე საპასუხოდ დაწერა, რომ ჯგუფის წევრებმა "ვერ გაუძლეს ვაი 'პროგრესული' საზოგადოებრივი აზრის წნეხს".