თანასწორობის მოძრაობა გაზრდილი ჰომო/ტრანსფობიური განწყობების ფონზე უსაფრთხოებისა და თავდაცვისთვის საჭირო რეკომენდაციებს ავრცელებს, რომელიც გუშინდელი დღის შემდეგ ნებისმიერ მოქალაქეს შეიძლება დაეხმაროს.

ორგანიზაცია მოქალაქეებს ურჩევს:

  1. მოერიდეთ ქუჩაში მარტო გადაადგილებას;
  2. გასვლისას თან იქონიეთ დატენილი ტელეფონი, რათა საჭიროების შემთხვევაში, დაუკავშირდეთ პოლიციას;
  3. ჩამოწერეთ 112-ის აპლიკაცია (Android; iOS), რათა უფრო სწრაფად შეძლოთ პოლიციასთან დაკავშირება;
  4. თუ შეამჩნევთ, რომ ვინმე აგედევნათ, ეცადეთ, ბანკში ან მარკეტში მოახერხოთ შესვლა და სთხოვოთ პოლიციის გამოძახება.
  5. თან იქონიეთ ნაღდი თანხა, რათა საჭიროების შემთხვევაში ტაქსით გადაადგილდეთ.

თანასწორობის მოძრაობა ცხელი ხაზის ნომერსაც აქვეყნებს და მოქალაქეებს საჭიროების შემთხვევაში დახმარებასაც სთავაზობს. ორგანიზაციის ცხელი ხაზის ნომერია: 032 2479748


ჰომოფობიური და ძალადობრივი ჯგუფების კონტრაქციაზე მედიის 50-ზე მეტი წარმომადგენელი დაშავდა. მათ თავს ძალადობრივი ჯგუფები დაესხნენ და ტექნიკაც დაუზიანეს. ჟურნალისტების ნაწილი მძიმე დაზიანებებით საავადმყოფოშია გადაყვანილი.

შინაგან საქმეთა სამინისტრომ დღის ბოლოს დაკავებულების შესახებ ინფორმაცია გაავრცელა. უწყებაში ამბობენ, რომ ძალადობის შემთხვევა 55 პირის მიმართ გამოვლინდა, ამათგან 53 სხვადასხვა მედიასაშუალების წარმომადგენელია. რაც შეეხება დაკავებულებს, ადმინისტრაციული წესით 8 ადამიანის დაკავების შემდეგ, შსს-მ 6 ივლისს კიდევ 3 ადამიანის დაკავების შესახებ განაცხადა. შსს-ს ინფორმაციით, ისინი მედიის წარმომადგენლების მიმართ განხორციელებული ფიზიკური ძალადობისა და ძალადობის მუქარით პროფესიულ საქმიანობაში უკანონოდ ხელის შეშლის ფაქტზე არიან დაკავებულები.

თბილისი პრაიდის კვირეული დღეს, 5 ივლისს ღირსების მარშით უნდა დასრულებულიყო, თუმცა თბილისი პრაიდმა განცხადება გაავრცელა და თქვა, რომ ღირსების მარში სოლიდარობისთვის დღეს აღარ ჩატარდება. აქამდე კვირეულის ფარგლებში კინოჩვენება და ფესტივალი ჩატარდა, რომლის ჩაშლა ჰომოფობებმა სცადეს, თუმცა არ გამოუვიდათ. ორივე შემთხვევაში პერიმეტრს პოლიცია იცავდა.