ქუთაისის ერთ-ერთ სკოლაში, მეორე სართულიდან 6 წლის ბავშვი გადმოვარდა. ადგილობრივი გამოცემა ქუთაისი თუდეი თვითმხილველებზე დაყრდნობით იუწყება, რომ მოსწავლე სხვა ბავშვებმა საპირფარეშოში ჩაკეტეს, ის კი ფანჯრიდან თავის დაღწევის მიზნით გადმოხტა.

ამ ინფორმაციას უარყოფენ სკოლის პედაგოგები. ერთ-ერთი მათგანი საზოგადოებრივ მაუწყებელთან საუბრისას ამბობს, რომ ბავშვი "კარგადაა", მის მშობლებს კი ამ ამბავზე ინფორმაციის გახმაურება არ სურს.

შინაგან საქმეთა სამინისტროს პრესსამსახურში On.ge-ს უთხრეს, რომ გამოძიება 124-ე მუხლით მიმდინარეობს, რაც ჯანმრთელობის ნაკლებად მძიმე დაზიანებას, გაუფრთხილებლობას გულისხმობს. უწყება აღნიშნულზე დამატებით განმარტებას არ აკეთებს.