დილიდან ჰომოფობიური და ძალადობრივი ჯგუფების ლიდერები მოქალაქეებსა და სამუშაო ადგილას მყოფ ჟურნალისტებზე ძალადობენ. დაშავებულია არაერთი პირი, პოლიცია ძალადობის ფაქტების დიდ ნაწილს თავად ესწრებოდა, თუმცა ამ დრომდე უცნობია დააკავა თუ არა შსს-მ რომელიმე მოძალადე.

დილიდან On.ge ცდილობს უწყებაში გაარკვიოს რამდენი პირი დააკავეს ან საერთოდ დააკავეს თუ არა ვინმე, თუმცა ამ დრომდე პასუხი არ მიგვიღია. შსს-მ ორჯერ გაავრცელა განცხადება, მაგრამ ორივე მათგანში მხოლოდ ის არის აღნიშნული, რომ გამოძიება დაიწყეს ჟურანლისტურ საქმიანობაში ხელშეშლაზე, ძალადობასა და სხვისი ნივთის დაზიანებაზე, არცერთ მათგანში ნახსენები არ არიან დაკავებულები.

"რუსთაველის გამზირზე მიმდინარე აქციაზე შეკრებილი ცალკეული პირების მხრიდან მედიასაშუალებების წარმომადგენელთა მიმართ განხორციელდა ძალადობრივი ქმედებები და პროფესიულ საქმიანობაში ხელის შეშლის ფაქტები. რუსთაველზე პოლიციის თანამშრომელთა რეაგირების შედეგად მედიასაშუალებების წარმომადგენლები ამ ეტაპზე უსაფრთხო ადგილზე არიან განთავსებული", — ეწერა უწყების პირველ განცხადებაში.

მაშინ, როცა პოლიციას მოძალადეები ადგილიდან არ გაჰყავდა და მხოლოდ დაშავებულებს არიდებდა ტერიტორიიდან, მათ გაავრცელეს მოწოდება რომ თბილისი პრაიდს უარი ეთქვა საჯარო სივრცეში მარშის გამართვაზე.

რაც შეეხება მეორე განცხადებას, იქ შსს წერს, რომ პირველ რიგში გმობს სიძულვილით მოტივირებულ ქმედებებს, მათ შორის მედიასაშუალებების წარმომადგენლების მიმართ გამოხატულ ძალადობის ნებისმიერ ფორმას. ამავდროულად უწყება ამტკიცებს, რომ "განაგრძობენ საზოგადოებრივი წესრიგის დაცვას" და მედიას მოუწოდებს რომ გაითვალისწინონ რისკები.

"მასობრივი ინფორმაციის საშუალებების წარმომადგენლებს, მოვუწოდებთ არსებული რისკების გათვალისწინებით ითანამშრომლონ პოლიციის თანამშრომლებთან, გაითვალისწინონ შინაგან საქმეთა სამინისტროს წარმომადგენლების მითითებები და რეკომენდაციები", — აცხადებს უწყება.

On.ge ისევ ელოდება შსს-ს პასუხს დაკავებულების შესახებ, განახლებულ ინფორმაციას მიღებისთანავე შემოგთავაზებთ.

გაიგეთ მეტი დაშავებულებზე: