ცენტრალურ იაპონიაში მეწყერის ჩამოწოლის შედეგად 2 ადამიანი გარდაიცვალა, ხოლო 20-ს ამ დრომდე ეძებენ. სტიქიამ პოპულარული საკურორტო ქალაი ატამი დააზარალა.

როგორც BBC წერს, სამძებრო სამუშაოებში ასობით მაშველია ჩართული. შაბათის მეწყერი ძლიერმა წვიმამ გამოიწვია, რის შედეგადაც სტიქიამ რამდენიმე სახლი წალეკა. ივლისის პირველ სამ დღეს იმაზე მეტი ნალექი წამოვიდა, ვიდრე ეს საშუალოდ მთელი თვის განმავლობაში ხდება.

ქალაქის მცხოვრები ყვება, რომ საშინელი ხმა გაიგონა, რის შემდეგაც გაიქცა, რადგან მიწის დიდი მასა თავის გზაზე ყველაფერს შთანთქავდა.

"ყველანაირად ვცდილობთ, რომ გადარჩენილები რაც შეიძლება სწრაფად ვიპოვოთ", — განაცხადა ადგილობრივი ხელისუფლების წარმომადგენელმა და დაამატა, რომ ოპერაციას ფრთხილად ატარებენ, რადგან წვიმა ჯერ კიდევ მოდის.

ატამის მერის, საკაე საიტოს თქმით, მეწყერი 300-მდე სახლს შეეხო. გარდა ამისა, სიძუოკის, კანაგავისა და ჩიბას პრეფექტურების მცხოვრებლებს ევაკუაცია დაევალათ მას შემდეგ, რაც დაბალ რაიონებში დატბორვის საშიშროების შესახებ გახდა ცნობილი.

ფოტო: AP

ფოტო: AP

ფოტო: AP

ფოტო: AP