პოლიციამ თბილისის პრაიდის ღონისძიების პარალელურად მობილიზებული ჰომოფობიური აქციის მონაწილეები დააკავა. ჯერჯერობით უცნობია რამდენი ადამიანია დაკავებული.

დღეს, 1 ივლისს პრაიდის კვირეული დოკუმენტური ფილმის ჩვენებით იხსნება. ადგილზე მობილიზებული არიან რადიკალური ჯგუფები, რომლებიც ღონისძიების ჩაშლას ცდილობენ.

საპატრულო პოლიციის დეპარტამენტის უფროსი, ვაჟა სირაძე პრაიდის კვირეულის ფარგლებში დაგეგმილ ღონისძიებაზე რადიკალური ჯგუფების მისვლასთან დაკავშირებით ამბობს, რომ ყველას აქვს სიტყვისა და გამოხატვის უფლება, როგორც ერთ, ასევე, მეორე მხარეს. სირაძე მოუწოდებს მათ, არ გასცდნენ სიტყვისა და გამოხატვის თავისუფლების ჩარჩოებს.

"კიდევ ერთხელ განვმარტავ, რომ ნებისმიერი ფაქტი სამართალდამცველზე თავდასხმის ან შეურაცხყოფის მკაცრად იქნება დასჯილი. კიდევ ერთხელ მოვუწოდებ ყველას, რომ იმოქმედონ კანონის შესაბამისად და თავიანთი უფლებები გამოხატონ კანონის ჩარჩოებში", — ამბობს სირაძე.