საქართველოს ახალგაზრდა იურისტთა ასოციაციის თავმჯდომარის, ნიკოლოზ სიმონიშვილის განცხადებით, საქალაქო სასამართლომ ბათუმი რივიერას მშენებლობა ისევ არ შეაჩერა. მისი თქმით, საქალაქო სასამართლომ სააპელაციო სასამართლოს მითითება მშენებლობის შეჩერებასთან დაკავშირებით არ გაითვალისწინა.

"ჩვენ ამ წლის იანვარში წარვადგინეთ შუამდგომლობა საქალაქო სასამართლოში, რომლითაც ვითხოვდით მშენებლობის ნებართვის შეჩერებას, რაც რა თქმა უნდა, გულისხმობდა შემდგომ უკვე ამ აქტის საფუძველზე მშენებლობის შეჩერებასაც. საქალაქო სასამართლომ, ფაქტობრივად, შაბლონურად ნორმებზე მითითებით საპროცედურო კანონმდებლობის დაუსაბუთებლად გვითხრა უარი აქტის მოქმედების შეჩერებაზე", — ამბობს ის.

სიმონიშვილის განცხადებით, ეს გადაწყვეტილება სააპელაციოში გაასაჩივრეს, რითაც საქალაქო სასამართლოს განჩინება გაუქმდა და მიეთითა, რომ იქ არ იყო მოსარჩელეების ინტერესები გათვალისწინებული.

"სააპელაციო სასამართლომ პირდაპირ მიუთითა საქალაქო სასამართლოს, რომ აქტის მოქმედების შეჩერებასთან მიმართებით, უნდა მიეღო გადაწყვეტილება პირველი ინსტანციის გადაწყვეტილების პერიოდამდე. თუმცა საქმის საქალაქო სასამართლოში დაბრუნების შემდეგ, საქალაქო სასამართლოს მოსამართლემ კვლავ არ დააკმაყოფილა ჩვენი მოთხოვნა [...] ძალიან დაუსაბუთებელი განჩინებით ისევ უარი თქვა აქტის მოქმედების შეჩერებაზე, რითაც, ფაქტობრივად, უგულებელყო ზედა ინსტანციის სასამართლოს მითითება და კვლავ მიიღო უკანონო გადაწყვეტილება", — აღნიშნა მან.

მისი თქმით, საია ამ გადაწყვეტილებას სააპელაციოში კვლავ გაასაჩივრებს.

"იმედი გვაქვს, რომ სააპელაციო სასამართლო ამჯერად უფრო მომზადებული დახვდება ამ განჩინებას, მიიღებს იმ გადაწყვეტილების, რომელიც უნდა მიიღოს და თვითონ შეაჩეროს ამ აქტის მოქმედება", — ამბობს ის.

2019 წლის 20 აგვისტოს ბათუმის საკრებულომ ხმაურის ფონზე ქალაქის ისტორიულ ნაწილში სილქ როუდ ჯგუფის შვილობილ კომპანიას, რივიერა ბათუმს განაშენიანების რეგულირების გემის დაამტკიცა. საუბარია გოგებაშვილისა და ზღვის მიმდებარე ტერიტორიაზე. აქტივისტები და მოქალაქეები პროექტს აპროტესტებდნენ და დეპუტატებს მოუწოდებდნენ, მისთვის მხარი არ დაეჭირათ.

კომპანია ბათუმის კონცხზე ხუთი ცათამბჯენის აშენებას გეგმავს. ბათუმის მერიაში მაშინ აცხადებდნენ, რომ ზღვის სანაპიროზე ხუთი ცათამბჯენის მშენებლობა საფრთხეს არ წარმოადგენს.