ტელეკომპანია რუსთავი 2-ის იურისტებმა სტრასბურგის სასამართლოს მიმართა. ტელეკომპანიის იურისტი, თამთა მურადაშვილი ამბობს, რომ მათ სტრასბურგის სასამართლოში აღსრულების დროებითი შეჩერების ღონისძიების შესახებ მოთხოვნა გააგზავნეს. იურისტმა ამის შესახებ რუსთავი 2-ის ეთერში ისაუბრა.

„ეს არის სარჩელის უზრუნველყოფის ღონისძიების შესახებ მოთხოვნა, რაც გულისხმობს იმას, რომ ჩვენ ვთხოვთ ადამიანის უფლებათა და თავისუფლებათა ევროპულ სასამართლოს, რომ შეაჩეროს საქართველოს უზენაესი სასამართლოს 2 მარტის გადაწყვეტილების აღსრულება იმ მომენტამდე, სანამ არ იქნება არსებითად განხილული ჩვენი სარჩელი,“ - აღნიშნა თამთა მურადაშვილმა.

მურადაშვილი აღნიშნავს, რომ სტრასბურგის სასამართლოს მიერ სიტყვის თავისუფლებასთან დაკავშირებით სარჩელის უზრუნველყოფის გამოყენების პრეცედენტი ამ დრომდე არ არსებობს და შესაძლოა მათი მოთხოვნა გათვალისწინებული არ იყოს. მისი თქმით, სასამართლოს პასუხი რამდენიმე დღეში გახდება ცნობილი.

იმ შემთხვევაში, თუ სტრასბურგის სასამართლო დააკმაყოფილებს ტელეკომპანიის იურისტების მოთხოვნას საქართველოს ვალდებულება ექნება შეაჩეროს უზენაესი სასამართლოს გადაწყვეტილების აღსრულება.