რუსთავი 2 და საქართველო კიდევ ერთხელ მოექცა მსოფლიო მედიის ყურადღების ცენტრში. უზენაესი სასამართლოს მიერ მიღებულ 2 მარტის გადაწყვეტილებას, რუსთავი 2-ის მფლობელის ცვლილებასთან დაკავშირებით, ეხმაურებიან Reuters, BBC, Euronews და სხვები.

უცხოურმა მედიასაშუალებებმა აქტიურად გააშუქეს საქართველოში ამერიკის საელჩოს მიერ გამოთქმული შეშფოთება ამ საკითხზე.

"საქართველოს უზენაესმა სასამართლომ გადაწყვეტილება დამოუკიდებელი ტელეარხის საწინააღმდეგოდ მიიღო" - წერს როიტერსი.

ამავე სააგენტოს თქმით, სასამართლომ ყველაზე დიდი დამოუკიდებელი ტელეარხი მის ყოფილ მფლობელს დაუბრუნა, რამაც როგორც საქართველოში, ისე მის ფარგლებს გარეთ, კრიტიკა გამოიწვია და შეფასდა, როგორც მედიის გაჩუმებისთვის გადადგმული ნაბიჯი.

ხელისუფლების წარმომადგენლები რუსთავი 2-ს მიკერძოებულობაში ადანაშაულებდნენ, ხოლო კრიტიკოსები აცხადებდნენ, რომ ქიბარ ხალვაში, რომელსაც სასამართლომ არხი მიაკუთვნა, ქართულ ოცნებასთან დაახლოებული პირია და რომ ის ერთადერთი ძლიერი არხის გაჩუმებას გეგმავს.

როიტერსი ასევე წერს, თუ რამდენად მნიშვნელოვანია საქართველოსთვის მედიის დამოუკიდებლობა, ევროატლანტიკურ სივრცეში მისი გაწევრიანების გზაზე.

"საქართველოში აურზაურია ტელეარხთან დაკავშირებული სასამართლო გადაწყვეტილების გამო" - წერს ბიბისი და აქცენტს აკეთებს კრიტიკაზე, რომელიც ამ გადაწყვეტილების შემდეგ ხელისუფლებამ მიიღო.

ბრიტანული მედიაგიგანტი ასევე უსვამს ხაზს ხალვაშისა და ქართული ოცნების ურთიერთობაზე და იმაზე, რომ ბიზნესმენი ხელისუფლების მხარდამჭერია.

"ათასობით ადამიანი გამოვიდა რუსთავი 2-ის დასაცავად საქართველოს დედაქალაქში სასამართლოს ვერდიქტის გასაპროტესტებლად, რომელმაც ყველაზე პოპულარული ოპოზიციური ტელეარხი ხელისუფლებასთან მეგობრულ ურთიერთობაში მყოფ პირს მფლობელობაში გადასცა" - წერს რიფაბლიქი.

მედიაგამოცემა ხაზს უსვამს საქმის გარშემო არსებულ შეფასებას, რომელიც კრიტიკული მედიის გაჩუმებას გულისხმობს.