მეზობლებს შორის გაუგებრობა, კამათი და დაპირისპირება უამრავი ადამიანისთვის კარგად ნაცნობი თემაა, თუმცა ინგლისის ქალაქ შეფილდში მსგავსმა დავამ, სამწუხაროდ, ერთი უდანაშაულო ხე დააზარალა.

ბჰარატ მისტრისა და მის მეზობელს შორის ურთიერთობა მას შემდეგ დაიძაბა, რაც ისინი 25 წლის ხის ბედზე ვერ შეთანხმდნენ. ხის ტოტები მისტრის მეზობლის ეზოში იჭრება. მეზობელს ხეზე მყოფი ფრინველების ჭიკჭიკი და მათ მიერ ეზოს დაბინძურება აწუხებდა, თუმცა მისტრის ხის მოჭრა არ სურდა.

თავდაპირველად მეზობლები ორივე მხარისთვის მისაღებ გადაწყვეტილებებს განიხილავდნენ, როგორიც იყო, მაგალითად, ხის ქვეშ ბადეების დამონტაჟება, რაც ეზოს დაბინძურებისგან დაიცავდა. მოლაპარაკებები 1 წლის განმავლობაში მიმდინარეობდა, თუმცა რამდენიმე დღის წინ ბჰარატ მისტრის სახლის წინ უცნაური სანახაობა დახვდა — შუაზე გაჭრილი ხე.

ხის ფოტო მალე Reddit-ზე გავრცელდა და მიმების ინსპირაციადაც კი იქცა, რის შემდეგაც მის სანახავად სამეზობლოს უამრავი ადამიანი ესტუმრა. მიუხედავად ამისა, უეცრად თავს დამტყდარი პოპულარობა, სამწუხაროდ, მეზობლებს შორის გაჩენილ დაპირისპირებასა და დაზარალებულ ხეს, ალბათ, ვერაფრით დაეხმარება.